Škoła №1 Fanipala ŭpieršyniu abviaściła pryjom u pieršyja kłasy z navučańniem na biełaruskaj movie. Zajavy ad baćkoŭ prymajucca da 25 žniŭnia. Umova — kali źbiarecca 20 zajaŭ ad baćkoŭ budučych pieršakłaśnikaŭ, biełaruskamoŭnamu kłasu być.
Ale… Za dva dni da kanca pryjomu dakumientaŭ na stale ŭ dyrektara try zajavy.
«Jašče try siamji vahajucca, bajacca, što dastatkovaj kolkaści achvotnych nie nabiarecca», — raskazała Janina Hrynievič, mama budučaj pieršakłaśnicy, jakaja i była inicyjatarkaj taho, kab biełaruskamoŭny kłas źjaviŭsia ŭ Fanipali.
«Pačała ja prychodzić u škołu jašče zimoj. Tady dyrektarka mnie nie skazała «tak», ale i nie admoviła. Skazała, što ŭ krasaviku budzie ahulnaškolny baćkoŭski schod, na jakim i ahučyć baćkam maju prapanovu».
Janina krasavickaha schodu dačakałasia, ale čakańniaŭ toj schod nie apraŭdaŭ.
«Dyrektarka na schodzie padkreśliła, što škoła ruskamoŭnaja. I što, u pryncypie, u nas raŭnapraŭje movaŭ. Kazała, što ŭ pačatkovaj škole na vyvučeńnie ruskaj i biełaruskaj movy roŭna vydzialajecca pa try hadziny».
Janina vyrašyła šukać adnadumcaŭ, dabivacca svajho praz adździeł adukacyi.
«Načalnica adździeła adukacyi paraiła mnie napisać zajavu ŭ škołu. Ale i padać zajavu akazałasia nie prosta. Zavuč škoły ledźvie nie sa skandałam admaŭlałasia ŭ mianie jaje prymać, tłumačyła tym, što škoła ruskamoŭnaja i ŭsia dakumientacyja ŭ ich viadziecca pa-rusku. Ja tady padumała, dobra, što ja pajšła padavać zajavu biez dački. Jak mnie było b tłumačyć šaścihadovamu dziciaci, što jaje nie chočuć vučyć pa-biełarusku?»
Dačku Janiny zavuć Alina. Dziaŭčynka doma razmaŭlaje pa-rusku i pa-biełarusku.
«Sa mnoj — pa-biełarusku, z tatam — pa-rusku. U majoj siamji taksama tak było. Tata razmaŭlaje vyklučna pa-biełarusku, mama — na ruskaj movie. Ale kali Alinie było čatyry-piać hodzikaŭ, ja zadumałasia. Niejak zabirała jaje z sadka, hutaryli pa-biełarusku, i mnie Alina zajaŭlaje: «Mama, hovori so mnoj po-normalnomu». U sensie? Ja tady i zadumałasia, što kali ciapier nie patłumačyć dziciaci, što ŭ nas jość svaja admietnaja mova, to dalej zrabić heta budzie ciažej. Tamu adnaznačna vyrašyli, što vučycca dačka pavinna pa-biełarusku».
Ciapier Alinie šeść z pałovaj hadoŭ i bolš jana «havaryć pa-narmalnamu» nie prosić. Čytaje vieršyki na biełaruskaj movie, viedaje šmat kazak. Hulaje ź dziećmi ŭ dvary ŭ hulniu: «Jak heta budzie pa-biełarusu?»
«My railisia z dačkoj, pytalisia ŭ jaje, na jakoj movie jana choča vučycca. Dačka tady skazała: «Našto mnie vučycca pa-rusku, ja i tak viedaju hetuju movu. Vučycie mianie pa-biełarusku».
Ale na siońnia asablivaha aptymizmu ŭ Janiny niama.
«Na sajcie škoły abviestku pra toje, što idzie nabor u biełaruskamoŭnyja kłasy napisali pa-rusku. Dyrektar škoły abiacała, što dapamoža z raspaŭsiudam infarmacyi, a ŭ vyniku my z mužam drukavali abviestki na svaim chatnim pryntary i sami raskleivali ich pa Fanipali. A zavuč da hetaha času niezadavolenaja, što my napisali zajavu na navučańnie pa-biełarusku».
Kali vy žychar Fanipala, i chočacie, kab vaša dzicia pajšło ŭ biełaruskamoŭny kłas, źviažyciesia, kali łaska, ź Janinaj Hrynievič abo niepasredna z administracyjaj škoły:
Telefon Janiny: +375 (29) 504-32-06.
Telefony ŭ Fanipali 8-01716 94-100 (dyrektar), 8-01716 94-104 (namieśnik dyrektara) pa 25 žniŭnia.
