Biznesoviec Arkadź Izrailevič sudzicca z vydańniem «Novy čas», jakoje vypuściła šerah materyjałaŭ pra jaho datyčnaść da skandalnaha restarana «Pajedziem pajadzim». Jon choča spahnać z haziety 40 tysiač rubloŭ za «maralnyja pakuty, paharšeńnie stanu i škodu reputacyi».
Arkadź Izrailevič.
Pieršaje sudovaje pasiedžańnie, praŭda, ni da čaho nie pryviało — sam Izrailevič na jaho nie pryjšoŭ, a sud pastanaviŭ «udakładnić patrabavańni da haziety».
Jak zajaviŭ sam Izrailevič u kamientaryi «Našaj Nivie», jon pierahledzieŭ situacyju i hatovy adklikać pazoŭ.
«Mianie nie cikaviać tyja hrošy, ja nie chaču zabirać ich u niezaležnaj presy. Ja ŭvohule pavažaju niezaležnuju presu — zaŭsiody pavinien być adlustravany inšy pohlad. Ja taksama źviarnu ŭvahu, što pra Kurapaty ja nivodnaha kiepskaha słova nie skazaŭ, ja tolki nazvaŭ švondzierami tych, chto kidajecca pad mašyny i łajecca pry dzieciach. Ja taksama vybačyŭsia pierad Anisim [deputatku Alenu Anisim jon paličyŭ haspadarom haziety «Novy čas» — Red.].
A što da haziety… Nu voś Ivašyn [žurnalist Dzianis Ivašyn — aŭtar cykła rasśledavańniaŭ pra restaran u Kurapatach — Red.]— jon bačyć, što ja kateharyčna nie zhodny ź jaho pieršaj publikacyjaj, a potym nie kab pazvanić mnie! Vypuskaje jašče čatyry i ŭ sudzie abiacaje piatuju! Heta narmalna? Kali b jon sa mnoj pahavaryŭ, to ja b dakumientami raźbiŭ jaho śćvierdžańni.
Tamu ja prapanuju nastupnaje: razabracca da 10 vieraśnia ź jurystami. Voś siadaju ja sa svaim i hazieta sa svaim, davajcie jašče pobač pasadzim paru žurnalistaŭ: «Našu Nivu», «Tutbaj», «Svabodu». I pa kožnym punkcie pravierym.
Kali tam napisana praŭda, to ja ŭ hetym publična pryznajusia, kali nie, to majo patrabavańnie prostaje: «Novy Čas» napiša, što ich žurnalist Ivašyn nadrukavaŭ niepravieranuju infarmacyju, voś i ŭsio».
