U Biełarusi buduć vyniščać praktyku dareńnia padarunkaŭ daktaram u znak padziaki, paviedamiła načalnik upraŭleńnia kadravaj palityki, ustanoŭ adukacyi Ministerstva achovy zdaroŭja Volha Maršałka padčas kruhłaha stała ŭ BIEŁTA, pryśviečanaha abmierkavańniu normaŭ miedycynskaj etyki i deantałohii.
Jak raspaviała Volha Maršałka, pry naviedvańni balnicy ŭ adnoj z prybałtyjskich krain jana źviarnuła ŭvahu na nadpis «Najlepšaja padziaka doktaru — uśmieška pacyjenta», jakaja była raźmieščana na dźviarach u doktara. «Takim čynam tut prafiłaktyvali «padziaki» z boku pacyjentaŭ. Darečy, vielmi časta takaja inicyjatyva zychodzić mienavita ad pacyjenta, a nie doktara», - skazała načalnik upraŭleńnia.
Adkazvajučy na pytańnie, ci mohuć źjavicca takija nadpisy na dźviarach daktaroŭ Biełarusi, Volha Maršałka adkazała: «My razhladajem takuju mahčymaść. Aktyŭna vyvučajem hety vopyt. Nakolki nam viadoma, jon prynosić svoj plon». Ministerstva achovy zdaroŭja płanuje realizavać peŭnyja prafiłaktyčnyja mierapryjemstvy, nakiravanyja na ŭstalavańnie bolšaha ŭzajemarazumieńnia pamiž miedykami i pacyjentami. U ministerstvie raźličvajuć, što heta dazvolić vykaranić u pacyjentaŭ samu dumku ab mahčymaści niejkaj materyjalnaj padziaki.
Na dumku dacenta kafiedry hramadskaha zdaroŭja BiełMAPA Valeryi Sakolčyk, heta pytańnie nie arhanizataraŭ achovy zdaroŭja. Tut važna aśvieta nasielnictva, u tym liku siłami žurnalistaŭ. Patrebnyja tematyčnyja pieradačy, artykuły, kruhłyja stały.
U abnoŭlenym prajekcie pastanovy pra normy miedycynskaj etyki i deantałohii havorycca, što miedrabotniki nie pavinny dapuskać zdabyvańnia kamiercyjnaj vyhady. U hetuju normu układvałasia paniaćcie karupcyjnych prajavaŭ.
