22 žniŭnia bojka ŭ Homieli skončyłasia trahiedyjaj: adzin mužčyna zahinuŭ, inšaha pavieźli na «chutkaj».
Susiedzi raspaviadajuć — 49-hadovy Hienadź «adpačyvaŭ» u siabie ŭ kvatery ŭ kampanii 28-hadovaha chłopca i žančyny. Kala 6 hadzin viečara jany vychodzili z chaty. Kupiŭšy śpirtnoje ŭ najbližejšaj kramie, viarnulisia nazad. Małady čałaviek chutčej za ŭsio byŭ kvatarantam, jaki žyŭ u Hienadzia. Uvieś hety čas asablivaha šumu ŭ kvatery nie było.
Kala 21.50 skryvaŭleny małady čałaviek vybieh na leśvičnuju placoŭku i ŭpaŭ. U vobłaści šyi ŭ jaho była rana. Jak kažuć žychary doma, jon śćviardžaŭ, što «baicca» Hienadzia. Žančyna, jakaja była ŭ kampanii, hučna kryčała. Susiedzi vyklikali milicyju i chutkuju dapamohu. Kala 22.00 da doma prybyli milicyjaniery ŭ broniekamizelkach i z aŭtamatyčnaj zbrojaj, a taksama dźvie mašyny chutkaj dapamohi. Haspadar kvatery byŭ znojdzieny miortvym u siabie doma.
Pa paviedamleńniach vidavočcaŭ, zdareńnie vyhladała nastupnym čynam. Paśla sumiesnaha raśpivańnia śpirtnych napojaŭ pamiž mužčynami ŭźnikła svarka. Pavodle papiarednich danych, pieršym razanuŭ nažom Hienadź. U adkaz małady čałaviek nanios jamu niekalki nažavych ranieńniaŭ, ad jakich paciarpieły pamior. Padazravany, jakomu dapamahli miedyki, zatrymany.
Hienadź mieŭ niekalki sudzimaściej. Paśla śmierci maci žyŭ adzin. Pa słovach žycharoŭ doma, jon žyŭ zamknuta.