Artur Virbał prachodzić u spravie ŭ jakaści śviedki. U sudovaj zali jon paprasiŭ prabačeńnia ŭ Śviatłany Koržyč, piša Radyjo Svaboda.
31 žniŭnia na pracesie ŭ spravie ab śmierci Alaksandra Koržyča ŭ Mienskim abłasnym sudzie dapytali jaho byłoha kamandzira praparščyka Artura Virbała
Virbał byŭ adnym ź pieršych zatrymanych u Piečach u kastryčniku 2017 hodu. Pačatkova jaho abvinavačvali ŭ machlarstvie, u krasaviku 2018 hodu staršynia Śledčaha kamitetu Ivan Naskievič paviedamiŭ, što sprava Virbała vyłučanaja ŭ asobnaje pravodžańnie. Praparščyka abvinavačvajuć u złoŭžyvańni ŭładaj.
«10 lipienia, pa-mojmu, heta było, — raskazaŭ Virbał u sudzie. — Byŭ peryjad, kali ja mieŭ patrebu ŭ hrašach. Paprasiŭ pazyčyć mnie siaržanta Baranoŭskaha. Jon skazaŭ, što sam nia maje hrošaj, ale pasprabuje znajści. Praź niejki čas pryvioŭ da mianie Koržyča. Koržyč skazaŭ, što moža mnie pazyčyć hrošaj, ale prosić taksama dla jaho źniać hrošy ŭ bankamacie. Ja pahadziŭsia».
Virbał raskazaŭ, što skarystaŭsia kartkaju Koržyča dvojčy. Spačatku nabyŭ ź jaje dapamohaj dla siabie pradukty ŭ kramie, zatym z bankamatu źniaŭ 20 rubloŭ dla Koržyča.
«Kartka ŭ mianie była prykładna tydzień, — raskazaŭ Virbał. — Pazyku ja viarnuŭ paśla druhoj častki svajho adpačynku. Na toj momant Koržyč užo źviarnuŭsia da Sukavienki (kamandzir roty). Sukavienka mnie nahadaŭ, ja ŭsio viarnuŭ — 45 rubloŭ. Heta adbyłosia 6 žniŭnia».
Virbał taksama paviedamiŭ, što z usimi sasłužyŭcami byŭ u dobrych adnosinach, staraŭsia dapamahać usim. Sa słovaŭ praparščyka, jamu soramna za toje, što skarystaŭsia hrašami padnačalenaha.
«Mnie soramna, što ja ŭlez u hetuju spravu, — skazaŭ Virbał maci Alaksandra Koržyča Śviatłanie. — Chaču pierad vami paprasić prabačeńnia. Prabačcie, kali ja vam pryčyniŭ škodu. Mnie soramna. Ale ja nia ździejśniŭ ničoha kryminalnaha. Prosta dapuściŭ pamyłku».
Pavodle Artura Virbała, pry im abvinavačanyja siaržanty nie nanosili ŭdaraŭ sałdatam, mahli tolki padvysić hołas na ich. Pra vypadki niestatutnych adnosinaŭ Virbał taksama ničoha paviedamić na sudzie nia zmoh.
