Ilustracyjnaje fota, «Naftan-Palimir»

Ilustracyjnaje fota, «Naftan-Palimir»

Ukraina ŭ «intaresach nacyjanalnych vytvorcaŭ» ad 1 vieraśnia abmiežavała pastaŭki siernaj kisłaty i aleŭma, jakija tradycyjna nabyvalisia na troch siarod najbujniejšych chimičnych pradpryjemstvaŭ Biełarusi — Homielskim chimičnym zavodzie, navapołackim «Naftanie» i «HrodnaAzocie», piša Radyjo Svaboda.

Jak paviedamili ŭ Ministerstvie ekanamičnaha raźvićcia i handlu Ŭkrainy, rašeńnie ab uviadzieńni kvotaŭ u vyniku antydempinhavaha raśśledavańnia ŭchvaliła Mižviedamasnaja kamisija ŭ pytańniach mižnarodnaha handlu.

Abmiežavanyja mahčymaści

Kvatavańnie biełaruskaj pradukcyi budzie ažyćciaŭlacca na praciahu troch hadoŭ: da 31 žniŭnia 2019 hodu Biełaruś zmoža pastavić va Ŭkrainu 30,769 tysiač ton pradukcyi, ad 1 vieraśnia 2019 da 31 žniŭnia 2020 — 32,307 tysiač ton i na trecim etapie (1 vieraśnia 2020 da 31 žniŭnia 2021) — 33,923 tysiač ton.

Adnačasova ŭviedzienyja kvoty dla analahičnaj rasiejskaj pradukcyi i šerahu krain, za vyklučeńniem krain Afryki, Azii i SND (Armenii, Kazachstanu, Azerbajdžanu dy inšych). Pavodle kamisii, uviadzieńnie kvotaŭ dazvolić ukrainskim pradpryjemstvam pavialičyć abjomy vytvorčaści, a taksama dyversyfikavać pastaŭki.

Pavodle ŭkrainskich ekanamistaŭ, častka biełaruskaj pradukcyi na ŭkrainskim rynku za apošnija čatyry hady dasiahnuła 99% — impart siernaj kisłaty z 2014 hoda da 2017-ha pavialičyŭsia bolš jak utraja, a jaje vartaść była ŭdvaja mienšaj za sabiekošt ukrainskich vytvorcaŭ.

Da 2014 hodu ŭnutrany rynak Ukrainy siernaj kisłatoj u asnoŭnym zabiaśpiečvali pradpryjemstvy Krymu i Danbasu. Spažyŭcy hetaj pradukcyi vymušany byli pavialičyć jaje pastaŭki z-za miažy z 21 tysiačy da amal 100 tysiač ton paśla aneksii Krymu i akupacyi častki Danbasu.

Chto za i chto suprać abmiežavańniaŭ

U Sajuzie chimikaŭ Ukrainy rasceńvajuć hety krok jak padtrymku nacyjanalnych vytvorcaŭ, jakija vymušanyja byli skaracić vypusk svajoj pradukcyi z-za pavieličeńnia bolš tannaha impartu.

Pavodle kiraŭnika arhanizacyi Alaksieja Hołubava, dalejšaje ihnaravańnie takoha faktu z boku dziaržavy mahło pryvieści «da źniščeńnia ŭkrainskaj vytvorčaści siernaj kisłaty i poŭnaj impartazaležnaści chimičnaj pramysłovaści, a taksama zdabyčy i abahačeńnia ŭranavaj rudy, vytvorčaści vybuchovych rečyvaŭ i bojeprypasaŭ, što va ŭmovach praciahłaha ŭzbrojenaha kanfliktu na ŭschodzie Ŭkrainy jość pytańniem nia tolki biznes-intaresaŭ, ale i abaronazdolnaści dziaržavy».

Pradpryjemstvy metalurhičnaj haliny, jakaja jość adnym z asnoŭnych spažyŭcoŭ biełaruskaj siernaj kisłaty, — mienš aptymistyčnyja.

Prezydent abjadnańnia pradpryjemstvaŭ «Ukrmetalurhpram» Alaksandar Kalankoŭ nie vyklučaje, što paśla ŭviadzieńnia impartnych kvotaŭ ź 1 vieraśnia moža skłaścisia deficyt siernaj kisłaty pry adnačasovym pavieličeńni jaje vartaści.

Košt pytańnia

Sioleta ŭ pieršym paŭhodździ Biełaruś ekspartavała va Ŭkrainu 25,569 tysiač ton siernaj kisłaty. I chacia ŭ fizyčnym abjomie heta na 2% mienš za analahičny letašni peryjad, u hrašovym vymiareńni vartaść sioletnich pastavak pavialičyłasia da 1,123 miljona z 606,9 tysiač dalaraŭ u studzieni-červieni 2017 hodu.

Siernaja kisłata vykarystoŭvajecca ŭ vytvorčaści fosfarnych i azotnych uhnajeńniaŭ, dvuchvokisu tytanu, vybuchovych rečyvaŭ, syntetyčnych myjnych srodkaŭ, a taksama dla ŭtylizacyi paroŭ amijaku, jakija ŭtvarajucca ŭ pracesie vytvorčaści koksu. U metalurhii i mašynabudavańni — dla tručeńnia metału ad iržy, a ŭ enerhietycy — dla ačystki katłoŭ, trubapravodaŭ na CES i AES ad šumavińnia vady.

Клас
0
Панылы сорам
0
Ха-ха
0
Ого
0
Сумна
0
Абуральна
0