Rodnyja i muzyčnyja kiraŭniki finalistaŭ nacyjanalnaha adboru dziciačaha «Jeŭrabačańnia 2018» napisali adkryty list u Biełteleradyjokampaniju. Jany nie zhodnyja z vynikami hałasavańnia i prosiać ich apublikavać. Tata pieramožcy taksama «za», paviedamlaje tut.by.

Na dziciačym «Jeŭrabačańni 2018.», jakoje sioleta projdzie ŭ Minsku, Biełaruś pradstavić Daniel Jastremski. Tradycyjna pieramožca finału vybirali pa sumie hałasoŭ, atrymanych ad hledačoŭ (praz zvanki i SMS) i prafiesijnaha žury. Hledačy addali jamu maksimum hałasoŭ, a žury - 4 z 12 mahčymych bałaŭ.

- Paśla finału pradstaŭniki inšych udzielnikaŭ byli niezadavolenyja vystupam Daniela, - raspaviadaje Ina Radajeva, mastacki kiraŭnik finalista Jarasłava Sakolikava. Pavodle jaje słoŭ, u vychadnyja niazhodnyja padrychtavali zvarot u Biełteleradyjokampaniju.

Podpisy pad dakumientam, kaža Uładzimir Žylin, tata finalistki Mašy Žylinaj, pastavili 18 čałaviek.

- Siarod ich pradstaŭniki siami ź dziesiaci finalistaŭ, - udakładniaje Ina Radajeva.

U liście, jaki adrasavany Ivanu Ejsmantu, staršyni Biełdziaržteleradyjokampanii, padpisanty nie pahadžajucca z apublikavanymi vynikami finału pa nastupnych pryčynach:

1. Nakručvańnie (prapłata) SMS-hałasavańniaŭ. Mahčymaść finansava zabiaśpiečanych udzielnikaŭ apłacić nieabmiežavanuju kolkaść hałasoŭ.

2. Padazreńnie ŭ padtasoŭcy hałasavańnia členaŭ žury z metaj zabieśpiačeńnia pieramohi zahadzia vyznačanaha ŭdzielnika.

Skrynšot lista ŭ Biełteleradyjokampaniju.

Skrynšot lista ŭ Biełteleradyjokampaniju.

- Paru hadoŭ tamu čamuści pierastali adkryta pakazvać hałasavańnie žury, - vykazvaje niezadavolenaść Ina Radajeva. - SMS i telefonnaje hałasavańnie taksama vybudavana vielmi niekarektna, jaho možna padrabić.

Padpisanty patrabujuć adkryć pratakoły hladackaha SMS- i telefonnaha hałasavańnia, pakazać, jak hałasavała žury, i, kali treba, pravieści pierahałasavańnie.

List u Biełteleradyjokampaniju nakiravali ŭ paniadziełak. Adkazu źbirajucca čakać dzion piać. Kali ničoha nie pryjdzie, pradstaŭniki finalistaŭ źbirajucca źviarnucca ŭ administracyju Jeŭrapiejskaha viaščalnaha sajuza dziciačaha Jeŭrabačańnia, JUNIESKA i Administracyju prezidenta.

Pra list u Biełteleradyjokampaniju tata Daniela Jastremskaha Alaksandr daviedaŭsia z zvanka tut.by. Jon kaža, što razumieje emocyi rodnych inšych finalistaŭ i zusim nie suprać, kali vyniki hałasavańnia hledačoŭ i žury abnarodujuć.

U Biełteleradyjokampanii paviedamili, što list atrymali, jon na razhladzie ŭ kiraŭnictva.

Клас
0
Панылы сорам
0
Ха-ха
0
Ого
0
Сумна
0
Абуральна
0