Ruch «Krymskaja salidarnaść» i prajekt «Krym.Riealii» paviedamili pra niekalki pieratrusaŭ u damach krymskich tataraŭ, jakija adbylisia ranicaj 4 vieraśnia.
Marlen Mustafajeŭ
U mikrarajonie Kamienka pad Simferopalem pieratrus adbyŭsia ŭ chacie aktyvista Marlena Mustafajeva. Paśla pieratrusu Mustafajeva advieźli ŭ adździaleńnie palicyi. Pavodle infarmacyi žonki zatrymanaha, suprać Mustafajeva zaviali spravu pavodle artykułu 282 č. 1 rasiejskaha kryminalnaha kodeksu (raspalvańnie nianaviści albo varožaści, prynižeńnie čałaviečaj hodnaści).
Rasiejskija siłaviki nie kamentujuć pieratrus, a advakat Mustafajeva Edem Siemiedlajeŭ paviedamiŭ, što jaho nie puskajuć da padabaronnaha.
U lutym 2017 hodu ŭ domie Mustafajeva prachodziŭ pieratrus pa spravie ab demanstracyi «ekstremisckaj simvoliki». Siłaviki kanfiskavali ŭ Mustafajeva kamputarnuju techniku i niekalki knih. Paźniej Mustafajeva aryštavali na 11 sutak, abvinavaciŭšy ŭ demanstracyi ekstremisckaj symboliki.
Zarema Kułamietava
U Starym Krymie ranicaj 4 vieraśnia pieratrus adbyŭsia ŭ chacie Zaremy Kułamietavoj. Pavodle dadzienych «Krymskaj salidarnaści», siłaviki zatrymali muža Zaremy Zekija Kułamietava i dačku Ryjanu Kułamietavu: tyja ŭstupili ŭ sprečku ź siłavikami. Ryjana Kułamietava paviedamiła «Krym.Riealii», što rasiejskija siłaviki pavieźli jaje maci ŭ nieviadomym kirunku.
Pavodle dadzienych «Krymskaj salidarnaści», pasiadžeńnie pa administracyjnym pravaparušeńni Zaremy i Ryjany Kułamietavych adbudziecca ŭ Kiraŭskim rajonnym sudzie ŭ pasiołku Kiraŭskaje ŭdzień 4 vieraśnia.
U lutym 2018 hodu Zaremu Kułamietovu vyklikali ŭ adździaleńnie palicyi. Palicyjanty zajavili, što Kułamietava abražała i pahražała žyćciu i zdaroŭju namieśnika načalnika rasiejskaj palicyi pa Kiraŭskim rajonie Andreju Rahožynu u dzień zatrymańnia jaje syna Hireja Kułamietava. U krasaviku 2018 hodu Kiraŭski rajonny sud pryznaŭ Kułamietavu vinavataj u publičnaj abrazie palicejskaha i pakaraŭ jaje 250 hadzinami abaviazkovych hramadzkich rabot i štrafam 20 tysiač rasiejskich rubloŭ (kala 600 biełaruskich).
Abdułach Jakubaŭ
U Starym Krymie pieratrus taksama adbyŭsia ŭ chacie krymskatatarskoho aktyvista Abdułacha Jakubava. U jaho kanfiskavali noŭtbuk, jaki naležaŭ jamu asabista, ale sam Jakubaŭ pakul jon nie zatrymany. Pieratrus, pavodle jaho, prachodziŭ paŭtary hadziny, siłaviki «byli vietlivyja, asablivaha harmidaru ŭ chacie nie zrabili».
