Žnivieński vizit Alaksandra Łukašenki na pradpryjemstvy Aršanskaha rajona skončyŭsia skandałam. Łukašenka zastaŭsia niezadavolenym stanam i aršanskaha instrumientalnaha zavoda, i zavoda «Technika suviazi», jaki znachodzicca ŭ Barani. U vyniku, palacieli hałovy ministraŭ.
U Barani Łukašenka prajšoŭsia pa pamiaškańniach, jakija nie padrychtavali da jaho vizitu. Pa słovach samoha Łukašenki, jaho tam sustreli «dochłyja pacuki, myšy, preziervatyvy i inšaja narkata».
«Dochłyja pacuki» doraha kaštavali i dyrektarcy Valancinie Višnieŭskaj. Pa słovach supracoŭnikaŭ, nieŭzabavie paśla pryjezdu Łukašenki jana «zvolniłasia pavodle ŭłasnaha žadańnia». Z pačatku vieraśnia pasadu kiraŭnika «Techniki suviazi» zaniaŭ Andrej Famin.
Taksama svaju pasadu vyzvaliła namieśnica dyrektara pa ideałohii i kadrach Natalla Złobič.
A niadaŭna miascovyja žychary zaŭvažyli niekalki ton śmiećcia, mebli i zapčastak, jakija vyvieźli z «Techniki suviazi».
Jak piša orshatut.by, vyčyścić pamiaškańni zavoda śpiašalisia da 1 vieraśnia — nibyta bajalisia «kantrolnaha vizitu» Łukašenki. Na hrandyjoznuju ŭborku pryvieźli navat ludziej ź inšych pradpryjemstvaŭ.
U vyniku, niekalki ton adpravilisia na tak zvany śmiecievy palihon — miesca, jakoje «Technika suviazi» pieraŭtvaryła ŭ zvałku, i kudy daŭno adpraŭlaje svaje budaŭničyja adkidy.
Ciapier bieton apynuŭsia pad śmiećciem z vyčyščanych cechaŭ i buldozier zasypaŭ usio ziamloj. Ale «pachavanyja» dreva i płastmasa harać pad ziamloj. Utvarylisia kratery, praź jakija vychodzić zadušlivy śmiardziučy dym i raspaŭsiudžvajecca pa navakolli, piša orshatut.by.
Pahavaryć z novym dyrektaram zavoda nakont śmiećcia nie atrymałasia. Pa słovach sakratarki, Andrej Famin uvieś dzień pravioŭ na vytvorčaści.
