pxhere.com
Pakul što dla źjaŭleńnia embryjonaŭ pry ekstrakarparalnym apładnieńni (EKA) mohuć vykarystoŭvacca pałavyja kletki ludziej, jakija znachodziacca ŭ šlubie pamiž saboj i sumiesna źviarnulisia pa EKA.
Prapanujecca dać takuju mahčymaść param, jakija aficyjna nie zarehistravali šlub. Pra heta išła razmova na kruhłym stale ŭ Saviecie Respubliki, na jakim abmiarkoŭvalisia papraŭki ŭ zakon ab dapamožnych repraduktyŭnych technałohijach (DRT), paviedamlaje BIEŁTA.
Hetaje pytańnie vyklikała haračaje abmierkavańnie. Na dumku adnych udzielnikaŭ kruhłaha stała, nielha ihnaravać isnujučyja tendencyi. U Biełarusi jość pary, jakija nie pabralisia aficyjna šlubam i majuć sumiesnych dziaciej. Jany paśpiachova realizujuć svajo prava na maciarynstva i baćkoŭstva.
Byli i tyja, chto vykazaŭsia suprać hetaha novaŭviadzieńnia. «Mienavita instytut šlubu i siamji abaraniaje pravy žančyny i dziciaci», — ličać inšyja.
Na dumku ŭdzielnikaŭ kruhłaha stała, kali param ŭ hramadzianskim šlubie daduć mahčymaść rabić EKA, nieabchodna dosyć surjozna prapracavać narmatyŭnuju bazu, kab zabiaśpiečyć abaronu narodžanaha dziciaci i ŭ nastupnym jaho majomasnyja pravy.
Abmiarkoŭvalisia i inšyja papraŭki.
U dziejučym zakanadaŭstvie surahatnaj maci moža być žančyna ad 20 da 35 hadoŭ. Uzrostavyja miežy ŭ takich vypadkach prapanujecca pašyryć da 49 hadoŭ uklučna. Akramia taho, u zakonaprajekcie dapuskajecca, što takaja žančyna moža nie być zamužam, ale tolki ŭ tym vypadku, kali ŭ jaje jość darosłyja dzieci i niama niepaŭnaletnich.
U prajekcie zakona prapanujecca taksama pavialičyć ŭzrostavy paroh dla donaraŭ pałavych kletak: z 40 da 50 hadoŭ dla mužčyn i da 49 hadoŭ uklučna — dla žančyn. Pry hetym u pieršym vypadku havorka idzie jak pra ananimnych, tak i pra nieananimnych donaraŭ. U druhim — tolki pra nieananimnych donaraŭ ź liku svajačak pacyjentki. Prapanovu ab pavieličeńni ŭzrostavaha paroha donara śpiermatazoidaŭ pastupiła ad navukoŭcaŭ-hienietykaŭ. Pa ich źviestkach, da 50 hadoŭ ŭzrost donara śpiermatazoidaŭ nijak nie ŭpłyvaje na vierahodnaść paśpiachovaha začaćcia.
Za hady praktyki prymianieńnia dapamožnych repraduktyŭnych technałohij u Biełarusi naradziłasia bolš za 10 tys. dziaciej, začatych z dapamohaj hetych technałohij.