Prezident Ukrainy Piatro Parašenka i patryjarch Kanstancinopalski Varfałamiej.
Sioleta ŭ traŭni ja pisaŭ: kab paźbiehnuć abvinavačańnia ŭ tym, što jon lehitymizuje raskolnikaŭ z Ukrainskaj Pravasłaŭnaj Carkvy Kijeŭskaha Patryjarchatu (UPC KP) i Ukrainskaj Aŭtakiefalnaj Pravasłaŭnaj Carkvy (UAPC), Usialenski Patryjarch Varfałamiej moža pryznačyć u Kijeŭ mitrapalita. I nie abviazkova kahości z ukrainskich archirejaŭ. Jon moža prysłać u Kijeŭ adnaho z tych biskupaŭ-ukraincaŭ, jakija słužać u Kanstancinopalskaj Carkvie. I navat całkam niejtralnaha čałavieka, hreka, moža prysłać. Voś hety ŭpaŭnavažany pradstaŭnik całkam kananičnaha i pieršaha ŭ Pravasłaŭi Patryjarcha i budzie stvarać novuju adzinuju pamiesnuju Carkvu va Ukrainie.
Učora Kanstancinopal učyniŭ bliskučy z punktu hledžańnia kananičnaha prava krok: jon nakiroŭvaje ŭ Kijeŭ svaich ekzarchaŭ.
Tut treba zrabić ahavorku: słova «ekzarchi» — čysta vizantyjskaja palitkarektnaść. Na adnoj i toj samaj terytoryi nie moža być niekalki ekzarchaŭ. Tamu va Ukrainie budzie ekzarch adzin — toj, u kaho vyšejšy tytuł. I heta Daniił (Zialinski), archibiskup Pamfilijski ŭ Złučanych Štatach Amieryki. Jaho tytuł taki: His Excellency Archbishop Daniel of Pamphilon. A ŭładyka Iłaryjon (Rudnik), biskup Edmantanski z Kanady, i sanam nižejšy, i tytuł maje nižejšy: His Grace Bishop Ilarion of Edmonton. U našaj abrusačnaj pravasłaŭnaj tradycyi pieršy ź ich Jaho Vysokapraaśviaščenstva, a druhi — Praaśviaščenstva. I ŭžo z hetaj pryčyny jany nie mohuć być roŭnyja.
Abodva archirei — i Daniił, i Iłaryjon — ukraincy. Abodva naradzilisia ŭ 1972 h. va Ukrainskaj SSR. Abodva stali klirykami Kanstancinopalskaha (Usialenskaha) Patryjarchata. Abodva pa daručeńni Fanara nie raz pryjazdžali va Ukrainu, i carkoŭnyja realii na svajoj radzimie viedajuć.
Ciapier paŭstajuć dva pytańni: dzie budzie rezidencyja ekzarcha i ŭ jakoj carkvie jany buduć adpraŭlać nabaženstvy? Pažadana i nie vyklučana, što słužyć jany buduć u niejkim chramie Ukrainskaj Pravasłaŭnaj Carkvy Maskoŭskaha Patryjarchata (UPC MP). Heta patrebna, znoŭ-taki, kab paźbiehnuć abvinavačańnia ŭ lehitymacyi raskolnikaŭ. Chto z UPC MP moža admović u hetym biskupam całkam kananičnaj Carkvy? A mahčyma i takoje: niechta ź ijerarchaŭ UPC MP pierajdzie pad amafor Usialenskaha Patryjarcha i addaść kanstancinopalskim biskupam adzin z chramaŭ u svajoj jeparchii. Taki ŭčynak archireja nielha budzie rascanić jak raskoł, jak pierachod z adnoj jurysdykcyi ŭ druhuju.
Kali biskupy UPC (MP), jakija chočuć być u pamiesnaj Ukrainskaj Carkvie, učyniać prosta pierachod z adnaje jurysdykcyi ŭ druhuju, dyk archirejam UPC KP i UAPC treba budzie, kab vyjści z raskołu, pračytać ekzarchu Simvał viery i takim čynam paćvierdzić svajo pravasłaŭje, i zajavić ab pierachodzie pad amafor Usialenskaha Patryjarcha (heta, peŭna, budzie svajho rodu prysiaha). Tolki paśla hetaha ciapierašnija biskupy Kijeŭskaha Patryjarchatu i UAPC zmohuć razam ź biskupami Usialenskaha Patryjarchatu słužyć liturhiju i pryčaščacca z adnoj čašy. I tady Daniił i Iłaryjon zmohuć słužyć u ich chramach, nie bajučysia abvinavačańnia ŭ lehitymacyi raskołu.
Pryznačyŭšy va Ukrainu ekzarchaŭ, Fanar pravodzić svajho rodu test: chto ź biskupaŭ UPC KP i UAPC byŭ ščyry, kali padpisvaŭ zajavu ab svaim žadańni bačyć va Ukrainie pamiesnuju Carkvu.
Mianie, naprykład, cikavić, jak budzie pavodzić siabie pradstajalnik Kijeŭskaha Patryjarchatu Fiłaret (Dzienisienka). Jamu treba ciapier — rad-niavola — pryznać źvierchnaść Varfałamieja i pračytać Simvał viery. Aprača taho, jamu treba pazbavicca anafiemy, jakoju jaho pakarała Maskoŭskaja Carkva. Sinod Usialenskaha Patryjarchata, majučy takoje prava, jaho pakul što jaho nie apraŭdvaŭ.
Učora pačałasia implemientacyja pastanovy Sinoda Usialenskaha Patryjarchatu ab aŭtakiefalii Carkvy va Ukrainie. Praces pačniecca z pryjezdam Daniiła i Iłaryjona ŭ Kijeŭ. Ciapier užo ad pravasłaŭnaha jepiskapata, duchavienstva i viernikaŭ va Ukrainie zaležyć, jak chutka novaja pamiesnaja Carkva aformicca i atrymaje tomas ab aŭtakiefalii.
