Siarhiej Jasiukievič. Fota: sacyjalnyja sietki

Siarhiej Jasiukievič. Fota: sacyjalnyja sietki

Svajaki sałdata, jakoha znajšli paviešanym u lesie pad Hrodna, raspaviadajuć pra padziei, jakija papiaredničali trahičnamu zdareńniu. Radyjo Svaboda pahutaryła sa stryječnaj siastroj chłopca, Volhaj.

Imia zahinułaha sałdata — Siarhiej Jasiukievič, jamu musiła spoŭnicca 27 hadoŭ sioleta ŭ śniežni. Raniej Ministerstva abarony paviedamiła, što małady čałaviek słužyŭ u Hrodzienskim harnizonie ciaham užo 16 miesiacaŭ. 5 vieraśnia jon samavolna pakinuŭ svaju častku, a 8 vieraśnia jaho znajšli paviešanym u lesie. Siarhiej pakinuŭ pieradśmiarotnuju zapisku, ź jakoj, pavodle Minabarony, vynikała, što pryčyna śmierci maje «asabisty charaktar».

Svajačka chłopca raspaviadaje, što Siarhiej da słužby ŭ vojsku trapiŭ pad upłyŭ kiepskaj kampanii i byŭ dvojčy sudzimy za kradziež, za što adbyvaŭ pakarańnie na volnym pasialeńni. Paźniej jon pracavaŭ u Maskvie, a ŭ 25 hadoŭ vyrašyŭ, što choča słužyć u vojsku pa kantrakcie.

«Kali jamu było 25 hadoŭ, niekalki razoŭ kazaŭ mnie, što choča pajści ŭ vojska i zastacca tam pracavać pa kantrakcie. Ale prablema ŭ tym, što z sudzimaściu vielmi ciažka trapić u vojska. Viedaju, što jon niekalki razoŭ da vajenkama ŭ Navahrudak, prasiŭsia. U vyniku ŭziali, pačaŭ słužyć», — raspaviała Volha.

Jana ŭdakładniła, što Siarhiej Jasiukievič naradziŭsia ŭ vioscy Jatra, pad Navahrudkam. Jaho baćka daŭno pamior, maci ciapier žyvie ŭ Navahrudku razam z dačkoj.

«Padčas jaho słužby my trymali kantakt, pierapisvalisia ŭ Ukantakcie. Jon peryjadyčna prasiŭ hrošy — to 10, to 20, a to i 50 rubloŭ. Kali pytała, navošta, adkazvaŭ niaŭciamna, maŭlaŭ na cyharety. Jon dasyłaŭ mnie numary kartak ci nieviadomyja mnie numary telefonaŭ, kudy treba było pieravieści hrošy. Pamiataju, što ja navat aburałasia, čałaviek ža nibyta znachodzicca na dziaržaŭnym zabieśpiačeńni, a tut niemałyja hrošy prosić», — dadała Volha.

Dalej žančyna skazała, što joj viadoma pra toje, što Siarhieju ŭ červieni prastrelili ruku, jon znachodziŭsia na lačeńni ŭ Miensku.

«U aficyjnaj zajavie havorycca, što Siarhiej źnik u sieradu, 5 vieraśnia. Naša siamja ličyć, što heta nie zusim tak. Sprava ŭ tym, što ŭžo niekalki tydniaŭ mnie, a taksama jaho rodnaj siastry, jakaja žyvie ŭ Navahrudku, i bratu, jaki žyvie ŭ Maskvie, telefanujuć z vajskovych orhanaŭ i pytajucca, ci nia viedajem my, dzie Siarhiej, a taksama, z kim jon kamunikavaŭ. Da jaho rodnaj siastry, jakaja ciapier znachodzicca ŭ radzilnym domie na zachavańni, prychodzili vajskoŭcy i pytalisia, dzie Siarhiej. U hetaj historyi vielmi šmat niavyśvietlenaha, i ja navat nia viedaju, što dumać. Pra śmierć Siarhieja mnie skazaŭ brat z Maskvy, jamu tady pazvanili i paviedamili», — dadała Volha.

Pachavańnie Siarhieja Jasiukieviča adbudziecca ŭ sieradu, 12 vieraśnia, u vioscy Jatra Navahrudskaha rajonu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?