Biznesmen Arkadź Izrailevič, jaki apošnim časam aktyŭna ŭdzielničaje ŭ sprečkach vakoł restarana «Pajedziem, pajadzim», daŭ intervju «Biełhaziecie», dzie adznačyŭsia adyjoznymi vykazvańniami.
«Miežy achoŭnych zonaŭ nie parušanyja. Navat kali parušanyja — jość cyvilizavanyja šlachi rašeńnia takich prablem. Ja žyvu la miemaryjału «Jama» [pavodle infarmacyi «NN», Izrailevič žyvie ŭ vioscy Drozdava, za kiłamietr ad Kurapataŭ — Red.] — čamu ni ŭ kaho nie baleła duša, kali tam budavali haścinicu «Chiłtan», za 20-50 mietraŭ ad «Jamy» znachodzicca masa restaranaŭ, u jakich pa načach muzyka hraje (i jašče jak hraje!). Park čaluskincaŭ, Traścianiec — u luboj kropcy Minska kaliści niešta niadobraje adbyvałasia.
Čamu jany ŭčapilisia ŭ Kurapaty? A čamu jany nie pikietujuć KDB, kab toj rassakreciŭ dakumienty pra toje, chto rasstralany ŭ Kurapatach? Ja nie chaču bluźnieryć, ale moža być tam byli i tyja, kaho i treba było rasstralać?»,
— skazaŭ Izrailevič.
Bizneśmien sarkastyčna prajšoŭsia pa abaroncach Kurapataŭ.
«Na moj pohlad, aŭtar artykułaŭ u «Novym časie» Dzianis Ivašyn, hałoŭny redaktar haziety Aksana Kołb źjaŭlajucca siabrami, jak ja ich nazyvaju, «ekstremisckaj hrupy baćki Sieviarynca i matki Šapućki», — adznačaje biznesoviec.
«Mianie ździŭlaje, što kamiera apieratara, jaki zdymaje ŭ Kurapatach dla ŚMI, kuplenaja na jeŭrapiejskija hrošy, a jany abaraniajuć intaresy ludziej, jakija prapahandujuć bytavy antysiemityzm. Mnie niezrazumieła, čamu hetyja ludzi stajać pad ściaham Jeŭrasajuza. Mnie cikava, jakaja kraina ŭ Jeŭropie ich padtrymlivaje? Čamu ES nie chvaluje, što tysiačy kiroŭcaŭ, jakija štodnia prajazdžajuć pa MKADzie, asacyjuiuć hetuju hrupu ź ich krainami? Ja nie vieru, što hetyja ludzi b doŭha prastajali pad ściahami SŠA i Izraila. Uiavicie maralny ŭzrovień hetych ludziej: vyklikać chutkuju, kali ŭ hety ž čas inšamu čałavieku moža być sapraŭdy kiepska, ci vyklikać milicyju, kali dzieści adbyviecca złačynstva», — adznačyŭ Izrailevič.
10 vieraśnia hazieta «Novy čas» vyjhrała sudovy praces u Arkadzia Izraileviča, jaki patrabavaŭ 40 tysiač biełaruskich rubloŭ maralnaj kampiensacyi za artykuły ŭ vydańni.
