Prezident ZŠA Donald Tramp padpisaŭ ukaz ab adkaznaści za ŭmiašańnie ŭ vybary, paviedamiŭ jaho savietnik pa nacyjanalnaj biaśpiecy Džon Bołtan.
Ukaz praduhledžvaje ŭviadzieńnie sankcyj suprać zamiežnych asob i arhanizacyj, jakich śpiecsłužby ZŠA buduć padazravać va ŭmiašańni ŭ vybary šlacham «kibieratak abo inšym čynam».
Abmiežavalnyja miery buduć uvodzicca taksama za raspaŭsiudžvańnie prapahandy i dezinfarmacyju. Sankcyi ŭklučajuć zamarozku aktyvaŭ, abmiežavańnie na ekspart i impart, zabaronu na atrymańnie inviestycyj ad hramadzian ZŠA i inšyja miery.
Bołtan dadaŭ, što ŭ dakumiencie nie nazyvajucca kankretnyja krainy, pakolki «pahrozy vybaram zychodziać ad niekalkich krynic».
