Abvinavačany Vialikabrytanijaj u atručvańni byłoha pałkoŭnika HRU Siarhieja Skrypala rasijanin Rusłan Bašyraŭ (brytanskija ŚMI ličać, što pad hetym imiem chavajecca pałkoŭnik rasijskaj vajennaj raźviedki Anatol Čapiha) byŭ uznaharodžany zvańniem Hieroja Rasii paśla anieksii Kryma. Pra heta paviedamlaje «Novaja hazieta» sa spasyłkaj na troch byłych tavaryšaŭ pa słužbie Čapihi, jakija paprasili nie nazyvać ich imionaŭ.
U pačatku 2000-ch jany prachodzili słužbu ŭ 282-m atradzie śpiecnaza, jaki dysłakujecca ŭ pryharadzie Chabaraŭska. Jak piša hazieta, u hetaj čaści słužyŭ lejtenant Anatol Čapiha.
«Bašyraŭ, ź jakim razmaŭlała Simańjan, — heta nie Bašyraŭ, a Anatol Čapiha. Źniešnie jon źmianiŭsia, ale hołas Bašyrava — heta hołas Toli», — raspavioŭ adzin z surazmoŭcaŭ vydańnia.
Pavodle krynic haziety, paśla zakančeńnia vajskovaha vučylišča Čapiha prachodziŭ słužbu va Usuryjsku, zatym u Chabaraŭsku, dzie byŭ pryznačany kamandziram raźviedhrupy.
«Čapiha ličyŭsia błatnym, ź im navat kamandzir atrada pałkoŭnik Biernikaŭ razmaŭlaŭ padkreślena vietliva», — adznačyła krynica.
Pavodle vydańnia, Čapiha byŭ uznaharodžany zvańniem Hieroja Rasii «za Krym». Čym kankretna zajmaŭsia Čapiha ŭ Krymie — nie paviedamlajecca.
Nahadajem, raniej rasijski žurnalist, udzielnik rasśledavańnia The Insider i Bellingcat Siarhiej Kanieŭ raspavioŭ, što, pavodle jaho infarmacyi, Čapiha atrymaŭ zvańnie Hieroja Rasii za vyvaz praz Krym u Rasiju byłoha prezidenta Ukrainy Viktara Janukoviča.