Administracyja Trampa adnaŭlaje ŭsie sankcyi ZŠA ŭ dačynieńni da Irana, jakija źniali ŭ ramkach jadziernaj uhody 2015 hoda, piša bbc.com.

Bieły dom zajaviŭ, što heta «samy žorstki režym sankcyj, jaki kali-niebudź ŭžyvaŭsia da Irana». Abmiežavańni zakranuć enierhietyku, sudnachodstva i bankaŭski siektar krainy.

Zrešty, vosiem krain, jakija impartujuć iranskuju naftu, ZŠA nie buduć karać.

Jadziernaja ŭhoda pa Iranie praduhledžvała, što kraina abmiažuje svaju supiarečlivuju jadziernuju dziejnaść, a ŭ abmien atrymaje palohku mižnarodnych sankcyj.

Barak Abama, jaki ŭ toj čas byŭ prezidentam ZŠA, śćviardžaŭ, što heta pahadnieńnie nie dazvolić Iranu raspracoŭvać jadziernuju zbroju.

Vialikabrytanija, Francyja, Hiermanija, Rasija i Kitaj taksama byli ŭdzielnikami ŭhody 2015 hoda. U adkaz na rašeńnie administracyi Trampa jany vyrašyli stvaryć novuju apłatnuju sistemu, kab abyści sankcyi ZŠA i zachavać biznes-adnosiny ź Iranam.

Tramp pierakanany, što ŭmovy ŭhody źjaŭlajucca nieprymalnymi. Na jaho dumku, damoŭlenaści nie spynili sprobaŭ Irana raspracavać prahramu balistyčnych rakiet i ŭvarvacca ŭ susiednija krainy, u tym liku Siryju i Jemien.

Iran abvinavaciŭ Trampa ŭ «psichałahičnaj vajnie».

Amierykanskija sankcyi ŭstupiać u siłu ŭ paniadziełak, 5 listapada. U sankcyjnyja śpisy trapiać bolš za 700 čałaviek, struktur, sudoŭ i samalotaŭ, u tym liku bujnyja banki, eksparcioraŭ nafty i sudnachodnyja kampanii.

ZŠA vysunuli 12 patrabavańniaŭ, jakija Iran pavinien vykanać, kab sankcyi byli admienienyja.

Siarod ich - spynić padtrymku teraryzmu i vajennaj interviencyi ŭ Siryi, a taksama całkam zharnuć prahramu raspracoŭki jadziernych i balistyčnych rakiet.

Клас
0
Панылы сорам
0
Ха-ха
0
Ого
0
Сумна
0
Абуральна
0