Aficer aŭstryjskaj armii, jakomu ciapier 70 hadoŭ, z 1990-ch hadoŭ pracavaŭ na rasijskuju raźviedku, atrymaŭšy za hety čas u jakaści ŭznaharodžańnia € 300 tysiač, paviedamlaje hazieta Krone Zeitung.
«Tak, hety vyklučny vypadak sapraŭdy maje miesca. My vielmi rady, što hety padazravany ciapier vykryty», — zajaviŭ vydańniu pres-sakratar Ministerstva abarony Aŭstryi.
Hazieta adznačaje, što «padazravany dziejničaŭ vielmi prafiesijna». Jon byŭ pałkoŭnikam u adstaŭcy i zajmaŭ «nieprykmietnuju pasadu» ŭ štabie aŭstryjskaj armii. Kožnyja dva tydni jon sustrakaŭsia sa svaim rasijskim kurataram «Juryjem» i atrymlivaŭ ad jaho zadańni. Zdabytyja źviestki pałkoŭnik, imia jakoha nie nazyvajecca, pieradavaŭ abo z dapamohaj zašyfravanych listoŭ, abo praz spadarožnikavuju suviaź.
«Krot» pieradavaŭ infarmacyju ab aŭstryjskich VPS, artyleryjskich sistemach, skłaŭ padrabiaznyja charaktarystyki mnohich vysokapastaŭlenych aficeraŭ armii, a taksama pieradavaŭ paviedamleńni ab situacyi ź mihrantami.
U artykule havorycca taksama, što rasijskija kuratary pałkoŭnika atrymali infarmacyju ab jaho mahčymym vykryćci i zahadali jamu źniščyć usie kampramietujučyja materyjały. «Našy ludzi zmahli heta praduchilić», - udakładniŭ surazmoŭca vydańnia i dadaŭ, što vyvučeńnie źmieściva noŭtbuka ahienta jašče praciahvajecca.
Dakumienty śviedčać, što ahient chacieŭ spynić špijonskuju dziejnaść jašče ŭ 2006 hodzie, adnak jaho kiraŭniki z Rasii nie dazvolili jamu heta zrabić.
Vydańnie adznačaje, što hety špijonski vypadak moža mocna ŭskładnić adnosiny Aŭstryi z Rasijaj.
Pa dadzienych Die Presse, padazravany, jakomu zaraz 70 hadoŭ, byŭ zavierbavany jašče ŭ 1988 hodzie.
