hurriyetdailynews.com
U rasparadžeńni tureckich ŚMI apynulisia aŭdyjazapisy, jakija zafiksavali momant zabojstva kałumnista The Washington Post Džamala Chašohi ŭ hienkonsulstvie Saudaŭskaj Aravii. Cytaty ź jaje pryvodzić miascovaje vydańnie Hürriyet Daily News.
Z zapisaŭ vynikaje, što žurnalista schapili ŭ adździaleńni «A», dzie raźmiaščajecca vizavy adździeł. «Adpuścicie maju ruku! Što vy sabie dazvalajecie?» — kryčaŭ Chašohi.
Tureckija pravaachoŭniki identyfikavali na zapisie hołas pałkoŭnika raźviedki Machiera Abdułaziza Mutreba, što rehularna supravadžaŭ naślednaha prynca Saudaŭskaj Aravii Machamieda bin Sałmana. «Zdradnik! Ty budzieš pryciahnuty da adkaznaści!» — nibyta kryčaŭ jon.
Hety ž hołas čuvać na zapisach razmoŭ z błoka «S», dzie raźmiaščajecca ofis konsuła. Adtul było zroblena 19 telefanavańniaŭ, u pracesie jakich Abdułaziz Mutreb kantaktavaŭ z daradcam naślednaha prynca Saudam al-Kachtani. Pieršy taki zvanok adbyŭsia praz 13 chvilin z momantu, kali Chašohi stupiŭ na paroh konsulstva.
Na praciahu siami chvilin na aŭdyjazapisie čuvać svarku pamiž Chašohi i čatyrma členami atrada, jakija prybyli ŭ Turcyju z karaleŭstva dla sustrečy z žurnalistam. Jany ž dastavili publicysta ŭ adździaleńnie «B», u jakim raźmieščany administracyjnyja departamienty. Na zapisie čuvać, jak Chašohi svarycca z zachopnikami, potym — huki fizičnaj baraćby, źbićcia i katavańniaŭ.
Fizičny hvałt nad žurnalistam praciahvaŭsia 11 chvilin, paśla čaho ŭ kabiniecie zapanavała cišynia.
Śledčyja ličać, što ŭ hety momant saŭdzielniki zabojstva ŭklučyli radyjočastotnyja pieraškody. Zatym jany raźbili kamiery nazirańnia i pačyścili ćviordyja dyski.
Praz 20 chvilin paśla śmierci kałumnista adnaho z členaŭ kamandy, jak miarkujecca, 57-hadovaha supracoŭnika saudaŭskich śpiecsłužbaŭ Mustafu al-Madani, apranuli ŭ vopratku Chašohi, kab toj pakazaŭ žurnalista, jaki vychodzić žyvym z konsulstva.
«Žudasna apranać vopratku čałavieka, jakoha my zabili 20 chvilin tamu», — kaža jon na aŭdyjazapisie. Mužčyna paskardziŭsia, što abutak zahinułaha mulaje, i jamu dazvolili pakinuć ŭłasnyja krasoŭki.
Hürriyet pakazvaje, što krasoŭki na dvajniku i vydali zabojcaŭ.
Hazieta adznačaje, što ŭ tureckich pravaachoŭnikaŭ niama zapisaŭ z korpusa «C», u jakim, jak miarkujecca, cieła kałumnista The Washington Post rasčlanili. Adnak istotnym dokazami jany ličać toj fakt, što ŭ troch pamiaškańniach u hetaj siekcyi adrazu paśla zabojstva pafarbavali ścieny. Akramia taho, byli vyjaŭlenyja reštki chimičnych rečyvaŭ na padłohach i adbitki palcaŭ padazravanych na elektryčnych razietkach. U pryvatnaści, adbitki pakinuŭ sudmiedekśpiert, jaki prybyŭ z saudaŭskaj kamandaj u Stambuł.
Tureckija ŭłady nie abnarodujuć aŭdyjazapisy i admaŭlajuć, što hienkonsulstva Saudaŭskaj Aravii prasłuchoŭvajecca. Adnak ŚMI rehularna publikujuć usio novyja detali zabojstva, jakoje adbyłosia tam, sa spasyłkaj na hetyja zapisy. Kopii plonki taksama byli pieradadzienyja ZŠA, Francyi, FRH, Vialikabrytanii i Saudaŭskaj Aravii. Na padstavie ŭsich dadzienych ab zabojstvie amierykanskija śpiecsłužby pryjšli da vysnovy, što hałoŭnym zakazčykam byŭ naśledny prync.
Chašohi zabili 2 kastryčnika, kali toj pryjšoŭ u dyppradstaŭnictva pa dakumienty, jakija dazvolili b jamu paćvierdzić razvod i zaklučyć novy šlub z hramadziankaj Turcyi. Niaviesta čakała jaho niepadalok ad konsulstva.
