Ihar Łasicki
U Minskim haradskim sudzie 11 studzienia pačaŭsia čarhovy praces z tak zvanaj «Spravy miedykaŭ». Ciapier na łavie padsudnych namieśnik ministra achovy zdaroŭja Ihar Łasicki, jakoha abvinavačvajuć u chabary.
Nahadajem, što ŭletku 2018 hoda u miežach baraćby z karupcyjaj u miedycynskaj śfiery prajšoŭ šerah zatrymańniaŭ: brali i zvyčajnych daktaroŭ, i načalnikaŭ, i funkcyjanieraŭ. Ahułam zaviali 95 kryminalnych spraŭ. Fihurantaŭ — bolš za 60 čałaviek.
Adzin ich — 51-hadovy Ihar Łasicki. Pa viersii śledstva, jon braŭ chabar. Razam z Łasickim sudziać i byłoha hałoŭnaha ŭrača stamatałahičnaj palikliniki №12 Minska Uładzimira Kraŭčonka. 56-hadovaha Kraŭčonka taksama abvinavačvajuć u chabarnictvie.
Abodvum pahražaje da 15 hadoŭ pazbaŭleńnia voli.
Hałoŭny doktar, jakoha sudziać za chabar: Ja sumlenny čałaviek
Uładzimir Kraŭčonak
Łasicki z momantu zatrymańnia i pa siońniašni dzień znachodzicca pad vartaj. Kraŭčonak siońnia pad chatnim aryštam (navat pracuje šarahovym stamatołaham u paliklinicy №7), jon padpisaŭ pahadnieńnie sa śledstvam, i tamu, chutčej za ŭsio, moža raźličvać na bolš miakki vyrak.
Na pačatku pasiadžeńnia prakuror začytaŭ abvinavačvańnie. I Łasicki, i Kraŭčonak brali hrošy ad biznesmienaŭ za patrebnyja rašeńni — kab miedycynskaje abstalavańnie zakupałasia ŭ «patrebnych» pastaŭščykoŭ.
U žniŭni 2015 hoda Łasicki — na toj momant užo namieśnik ministra i staršynia kamisii, jakaja zajmałasia tendarami — ŭ mašynie, pryparkavanaj kala restarana, atrymaŭ 1500 dalaraŭ ad pradstaŭnika minskaj firmy. Treba było, kab kamisija Minzdaroŭja pahadziłasia pryniać ad firmy miedycynskaje abstalavańnie.
U 2016 hodzie ad pradstaŭnika estonskaj firmy namieśnik ministra atrymaŭ 10 000 dalaraŭ. Za heta Łasicki musiŭ dapuścić firmu da ŭdziełu ŭ pastaŭkach abstalavańnia.
Uvosień 2016 hoda hrošy Łasickamu pieradaŭ druhi siońniašni fihurant — Uładzimir Kraŭčonak. U mašynie kala budynka Minzdaroŭja Kraŭčonak paznajomiŭ Łasickaha z dyrektarkaj kampanii-pastaŭščyka stamatałahičnaha abstalavańnia. Za 2000 dalaraŭ Łasicki musiŭ vyrašyć pytańnie ab zakupkach abstalavańnia ŭ hetaj kampanii.
Svaju vinu Ihar Łasicki pryznaŭ całkam.
Zatym ahučyli padrabiaznaści abvinavačańnia Uładzimira Kraŭčonka. Jon nios piersanalnuju adkaznaść za jakaść miedycynskaha abstalavańnia, jakoje zakupała paliklinika numar 12, padkreśliŭ prakuror, ale ździejśniŭ šrah złačynstvaŭ suprać intaresaŭ słužby.
U 2013 hodzie Kraŭčonak damoviŭsia z pradstaŭnikom kampanii «Hieoł M» ab nabyćci tamohrafa dla palikliniki. Paśla vystaivŭ zajaŭku na tendar, jaki vyjhrała mienavita patrebnaja jamu kampanija. Za heta Kraŭčonak atrymaŭ ad dyrektara kampanii-pastaŭščyka 10 tysiač dalaraŭ «uznaharody».
Cikava, što toj ža «Hieoł M» fihuruje i ŭ inšych spravach miedykaŭ. U Hrodnie idzie praces nad Andrejem Stryžakom, byłym kiraŭnikom upraŭleńnia achovy zdaroŭja miascovaha abłvykankama. Tam taja ž historyja — kali Stryžak uznačalvaŭ balnicu, to zakazaŭ aparat MRT u kampanii «Hieoł M», za što, jak i Kraŭčonak, atrymaŭ 10 tysiač dalaraŭ.
Taksama Uładzimir Kraŭčonak atrymlivaŭ chabar za patrebnyja damovy i ŭ 2016 hodzie. Sumy nie zaŭsiody byli vialikimi. Naprykład, adnojčy hałoŭny ŭrač za «pravilnaje» rašeńnie ŭziaŭ 300 dalaraŭ ad pradstaŭnika kampanii-pastaŭščyka. Paźniej, u inšy raz — 200 dalaraŭ.
Tak i praciahvałasia. U 2017 hodzie paliklinika zakupała stamatałahičnyja kresły. Pieramahli ŭ tendary «staryja znajomyja» — kampanija «Hieoł M». Kraŭčonka adździačyli za heta sumaj u 15 tysiač jeŭra. Hrošy pieradali ŭ mašynie, pryparkavanaj pobač z paliklinikaj.
Pad Novy hod u śniežni 2017 hoda Kraŭčonak atrymaŭ 3oo biełaruskich rubloŭ. Tak jaho adździačyŭ pradstaŭnik adnoj z kampanij, za zaklučanyja ciaham hodu damovy.
Uładzimir Kraŭčonak całkam pryznaŭ vinu.
Ihar Łasicki rodam z Bresta, ź siamji miedykaŭ. Maci była akušeram, baćka vajennym dermatavienierołaham. Łasicki vučyŭsia ŭ Minsku, ale pracavać piedyjatram pajechaŭ u Brest.
Paśla staŭ hałoŭnym uračom. Darečy, kali Łasicki ŭznačalvaŭ Bresckuju dziciačuju balnicu, to jaho namieśnikam byŭ Vasil Žarko — paźniej ministr achovy zdaroŭja.
Zatym Łasicki 5 hadoŭ pravioŭ na pasadzie kiraŭnika ŭpraŭleńnia achovy zdaroŭja Bresckaha abłvykankama. A ŭ 2013 hodzie svajho byłoha načalnika zaprasiŭ u stalicu Vasil Žarko, jaki na toj momant užo staŭ ministram achovy zdaroŭja. Ihar Łasicki zaniaŭ pasadu namieśnika Žarko, adkazvaŭ za materyjalna-techničnuju bazu i budaŭnictva, ekspart miedycynskich pasłuh.
