U internecie źjavilisia fotazdymki dziŭnych stravaŭ sa škoł Słonima. Ježa vyhladaje prosta jak vada z chlebam.
Strava ŭ słonimskim rajonnym licei.
Pieršym vykłaŭ fotazdymki telehram-kanał Nexta.
Strava ŭ škole №3 Słonima.
«Naša Niva» źviazałasia z kiraŭnictvam adnoj sa škoł, čyje stravy fihurujuć na fota. Vyśvietliłasia, što Milena Picišyna, vykanaŭca abaviazkaŭ dyrektara słonimskaj SŠ №10, užo ŭ kursie pra fotazdymki.
Strava ŭ SŠ №10 Słonima. Taki abied kaštuje 2 rubli.
Ale žančyna była łakaničnaj:
«Heta ŭ nas nazyvajecca bulon z hrenkami. Bolš ničoha skazać nie mahu, usie kamientary dała «Słonimskamu vieśniku».
Paźniej na hrodzienskim partale S13 źjaviŭsia kamientar adździeła adukacyi Słonima. Kažuć, heta teściravańnie novaha mieniu:
«Chaciełasia b krychu prajaśnić situacyju pa abmierkavańni mieniu školnaha abiedu. Tak, sapraŭdy, z 4 lutaha 2019 hoda ŭ škołach Słonimskaha rajona aprabujecca novaje mieniu. U mieniu ŭvajšli novyja stravy sa zbornika receptur, jakija raniej byli nie znajomyja dzieciam: zapiakanka markoŭnaja z tvarahom, bulbianyja aładki sa śviežaj kapustaj i morkvaj, ryba, zapiečanaja z morkvaj, rybnik, rys z harodninaj, sufle kurynaje, babka bulbianaja sa śvininaj, sufle tvarožnaje, bulon kuryny z hrenkami. Na praciahu dvuch tydniaŭ vyvučajecca spažyviecki popyt na novyja stravy, mierkavańnie vučniaŭ i ich pradstaŭnikoŭ. Paśla aprabavańnia hetaha ŭ mieniu buduć uniesieny źmieny z ulikam zapytaŭ dziaciej i ich baćkoŭ.
Technałahičnaja karta dla padrychtoŭki bulona kurynaha z hrenkami ŭziataja sa zbornika technałahičnych kart straŭ i vyrabaŭ dla dziaciej, zaćvierdžanaha pastanovaj Ministerstva handlu».
