Prezident Rasii Uładzimir Pucin padpisaŭ ukaz, jakim pryznačyŭ novym pasłom u Biełarusi člena Savieta Fiederacyi Dźmitryja Mieziencava. U dakumiencie nie paznačana, ci pryznačyŭ Pucin jaho svaim śpiecpradstaŭnikom (taki status byŭ u Babiča).

Dźmitryj Mieziencaŭ. Fota: urad Rasii.

Dźmitryj Mieziencaŭ. Fota: urad Rasii.

Dźmitryj Mieziencaŭ naradziŭsia 18 žniŭnia 1959 hoda ŭ Leninhradzie. U 1981 hodzie skončyŭ Leninhradski instytut inžynieraŭ čyhunačnaha transpartu. U 1984-1990 hadach słužyŭ aficeram u armii, byŭ supracoŭnikam armiejskaha druku. U 1991-1996 hadach — staršynia kamiteta pa druku i ŚMI meryi Sankt-Pieciarburha (u hety ž pieryjad kamitet pa źniešnich suviaziach meryi uznačalvaŭ Uładzimir Pucin). U 1998 hodzie abaraniŭ u Sankt-Pieciarburhskim dziaržaŭnym univiersitecie dysiertacyju na kandydata psichałahičnych navuk na temu «Psichałohija ŭpłyvu srodkaŭ masavaj infarmacyi na farmiravańnie palityčnych ustanovak asoby». Zajmaŭ pasadu hubiernatara Irkuckaj vobłaści (2009-2012) i hienieralnaha sakratara Šanchajskaj arhanizacyi supracoŭnictva (2013-2015). Z 2016 hoda Mieziencaŭ — člen Savieta Fiederacyi.

Sprabavaŭ udzielničać u vybarach na pasadu prezidenta Rasii ŭ 2012 hodzie. 14 śniežnia 2011 hoda prafsajuzny kamitet Uschodnie-sibirskaj čyhunki vysunuŭ Dźmitryja Mieziencava kandydatam u prezidenty Rasii. CVK Rasii admoviŭ Mieziencavu ŭ rehistracyi, bo ŭ jaho akazałasia niedastatkova podpisaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0