Pieršy namieśnik ministra suviazi i infarmatyzacyi Biełarusi Dźmitryj Šadko padaŭ zajavu ab adstaŭcy. Hetuju infarmacyju jon paćvierdziŭ Tut.by.
Dźmitryj Šadko. Fota: Ukantakcie.
«U hety momant znachodžusia ŭ adpačynku. Niekalki tydniaŭ tamu ja źviarnuŭsia va ŭrad z prośbaj ab adstaŭcy. Spadziajusia, siońnia budzie atrymana zhoda kiraŭnika dziaržavy», — skazaŭ Šadko.
Jon raźviejaŭ čutki pra toje, što pakinuŭ Biełaruś i nie maje namieru siudy viartacca na fonie zatrymańnia hiendyrektara «Biełtelekama». «U dalejšym ja źbirajusia pracavać i žyć u Biełarusi. Prosta ŭžo piać hadoŭ pracuju ŭ ministerstvie. Heta vielmi šmathranny i kaštoŭny vopyt. A zaraz jość novyja cikavyja prapanovy. Nie da piensii ž pracavać na adnym miescy», — rastłumačyŭ jon.
Dźmitryj Šadko naradziŭsia ŭ 1979 hodzie ŭ Minsku. Skončyŭ BDUIR i Akademiju kiravańnia pry prezidencie. Pracavaŭ u CK BPSM, pamočnikam hienieralnaha dyrektara, viadučym śpiecyjalistam ZAT «TKD Juniśpiektr», adkaznym sakratarom, namieśnikam hałoŭnaha redaktara, a zatym i hałoŭnym redaktaram časopisa «Płanieta», jaki zasnavaŭ «Biełtranshaz». U 2011 hodzie Šadko staŭ namieśnikam ministra infarmacyi, a praź niekalki hadoŭ pieršym namieśnikam ministra suviazi i infarmatyzacyi.
U pres-słužbie Minsuviazi skazali, što Dźmitryj Hienadzievič znachodzicca «druhi tydzień u płanavym adpačynku».
