Zabojstva lejtenanta DPS pad Mahilovam vyklikała šyroki rozhałas na infarmacyjnych sajtach i ŭ sacyjalnych sietkach. Na samych papularnych resursach pad navinoj pakinutyja sotni kamientaroŭ. Što dumajuć pra situacyju biełarusy?
Čytačy «Našaj Nivy» pastavili najbolšuju kolkaść łajkaŭ kamientaram pra nieefiektyŭnuju pracu milicyi, a taksama tym, jakija zaklikajuć adnavić paŭnavartasnuju miažu z Rasijaj. Nahadajem, zabojcy byli na aŭto z rasijskimi numarami.
«Nu pabačym, zdolejuć milicyjaniery chutka znajści zabojcaŭ svajho kalehi, albo tolki mitynhoŭščykaŭ łupić zdatnyja…», — piša čytač ź nikam BRSM. «Na ŭschodzie terminova patrebna miaža», — adznačaje Mmm.
Što nie padtrymlivajuć čytačy «Našaj Nivy», dyk heta antyhumanistyčnych nastrojaŭ. «Nu i što, ja ich nie škaduju» — kamientar z najbolšaj kolkaściu minusaŭ.
Na Onliner.by samy papularny kamientar datyčycca asoby ministra ŭnutranych spraŭ Ihara Šunieviča.
«Šunieviča ŭ adstaŭku. Heta vynik jaho pracy. Čamu supracoŭnik vyjechaŭ adzin na DTZ? Pavalny niekamplekt supracoŭnikaŭ. Ludziej nie chapaje. Tyja ŭmovy, jakija stvaryŭ ministr, vymušajuć ludziej zvalniacca. Šunievič, budź mužykom, padaj u adstaŭku», — zaklikaje veter1973.
Adzin z nastupnych pa papularnaści kamientaroŭ taksama datyčycca miažy z Rasijaj: «Miaža patrebna z uschodnim susiedam. I čamu na vyklik adzin pajechaŭ. Małady zusim», — piša upastt89.
Na Tut.by samy załajkany kamientar pryśviečany toj samaj temie.
«Chutčej za ŭsio «haściam» spatrebiłasia zbroja i forma. Ale bajusia, navat paśla takoha miažy my nie zakryjem…» — razvažaje Plyaer_Minsk.
«67 rehijon, Smalenskaja vobłaść. Z Mahiloŭščyny prajechać čornymi ściežkami elemientarna, značyć, niešta jany narabili, kali pajšli na zachop pradstaŭnika ŭłady, takoje nie darujecca», — padsumoŭvaje Natan.
