Błohier Siarhiej Piatruchin dniom 2 červienia vioŭ žyvuju tranślacyju z płoščy Lenina ŭ Breście, dzie znoŭ karmili hałuboŭ u znak pratestu suprać akumulatarnaha zavoda. Maŭklivaja akcyja znoŭ prajšła pad muzyku — na płoščy išoŭ zaklučny hała-kancert mižnarodnaha chareahrafičnaha fiestyvalu, paviedamlaje Bresckaja hazieta.
Pa słovach pravaabaroncy Uładzimira Vialičkina, na płoščy było kala 140 pratestoŭcaŭ. Prykładna ŭ 12.45 jany pajšli pa centralnych vulicach horada, kolkaść ludziej vyrasła da dvuch sotniaŭ.
Niepadalok išoŭ, nie pieraryvajučy strym, i Siarhiej Piatruchin. Jaho zapichnuli ŭ mašynu na rahu vulic Majakoŭskaha i Savieckaj i pavieźli ŭ nieviadomym kirunku. Chutčej za ŭsio, jon u Leninskim RAUS.
Kałona dajšła da kinateatra «Biełaruś», paśla čaho ludzi razyšlisia. Usio prachodziła pad nahladam milicyi. Ci byli jašče zatrymańnia, pakul što infarmacyi niama.
Siarhiej Piatruchin viadomy svaimi videarolikami na vostryja sacyjalnyja temy. Z 2018 hoda razam z błohieram ź Biarozy Alaksandram Kabanavym na YouTube-kanałach «Narodny reparcior» i «YouTube-deputaty» aśviatlaje temu budaŭnictva pad Brestam akumulatarnaha zavoda. Za svaju aktyŭnaść błohiery nieadnarazova pryciahvalisia da administracyjnaj adkaznaści.
