Alaksandar Husieŭ.
31 traŭnia ŭ amerykanskim horadzie Virdžynija-Bič padčas stralaniny, učynienaj municypalnym słužboŭcam, zahinuŭ biełarus, vychadziec z Mahilova, 35-hadovy Alaksandar Husieŭ. Razam ź im byli zastrelenyja jašče adzinaccać čałaviek i čaćviora z ranieńniami dastaŭlenyja ŭ špital, piša «Radyjo Svaboda».
Alaksandar imihravaŭ u ZŠA na vučobu ŭ 2003 hodzie. Atrymaŭ adukacyju inžynera i apošnija dzieviać hadoŭ pracavaŭ u municypalnych słužbach Virdžynii-Bič.
U 16 hadoŭ upeŭniŭsia, što ZŠA — kraina jahonaj mary
Svaboda adšukała ŭ Mahilovie stryječnuju siastru Alaksandra — Volhu. Jana žyvie ŭ kvatery, jakaja dastałasia jaje siamji paśla adjezdu ŭ Ameryku Alaksandra, jahonaha brata Alaksieja dy ich maci. Maci pajechała da synoŭ hod tamu. Baćka zastaŭsia ŭ Biełarusi.
Dom, u jakim žyŭ da emihracyi Alaksandar Husieŭ.
Kvatera Husievych u zvyčajnym panelnym piacipaviarchoviku adnaho sa spalnych rajonaŭ mahiloŭskaha Zadniaproŭja. Pa słovach Volhi, siamja Alaksandra nie vyłučałasia zamožnaściu, i kali jon pajechaŭ u Ameryku, raźličvać na dapamohu rodnych nia moh.
Pierad tym, jak imihravać, jon pa adukacyjnaj prahramie abmienu ŭ 16 hadoŭ pabyvaŭ u ZŠA i ŭpeŭniŭsia, što heta kraina jahonaj mary. U tyja časy Volha zapomniła brata, abkładzienaha padručnikami. Jon uvieś čas niešta vučyŭ, kaža jana.
Imihravaŭ u Ameryku ŭ niapoŭnyja 20 hadoŭ, sa 100 dalarami ŭ kišeni
Vučyŭsia Alaksandar u himnazii, jakuju vidać z voknaŭ jahonaha pakoju. Pavodle Volhi, brat byŭ zachopleny anhielskaj movaj i pa skančeńni himnazii vybraŭ kaledž, u jakim pahłyblena vyvučałasia hetaja mova. Potym pastupiŭ na histaryčny fakultet Mahiloŭskaha ŭniversytetu imia Kulašova, ale skončyŭ tolki dva kursy.
Volha kaža, što ŭ Ameryku Alaksandar pajechaŭ, kali jamu nie było 20 hadoŭ, sa 100 dalarami ŭ kišeni. Pieršyja hady jamu było duža ciažka, kaža jana. Pracavaŭ na meblevaj fabrycy. Paźniej Alaksandar skončyŭ kaledž i atrymaŭ stupień bakalaŭra.
«Heta ŭsio havoryć pra metanakiravanaść dy rozum brata. Niahledziačy na dasiahnieńni, jon nia staŭ ehaistyčnym. Zastavaŭsia dobrazyčlivym, z humaram čałaviekam. Vodhuki pra jaho samyja stanoŭčyja. Ciapier jahonaja staronka ŭ fejsbuk poŭnaja spačuvańniaŭ ad siabroŭ», — kaža Volha.
Nia raz pryjaždžaŭ na radzimu
Pa słovach surazmoŭnicy, Alaksandar nieadnojčy pryjaždžaŭ na radzimu. Raskazvaŭ pra svoj amerykanski pobyt. Adznačaŭ uzrovień žyćcia dy adnosiny miž ludźmi. Paraŭnoŭvaŭ ich ź biełaruskimi.
«Amerykanski ład žyćcia jamu duža padabaŭsia, — kaža siastra. — Jamu była daspadoby svaboda ŭ pierasoŭvańni i vandravańni. Jon byŭ zadavoleny svaim žyćciovym raskładam: ranicaj ustaŭ, schadziŭ na pracu, potym trenažornaja zala, zatym plažny baskietboł. Jon žyŭ, ale nie vyžyvaŭ».
Himnazija, u jakoj vučyŭsia Alaksandar Husieŭ.
Volha kaža, što ŭ Amerycy brat rabiŭ paśpiachovuju karjeru. Staŭ menedžeram municypalitetu. Prasoŭvaŭsia pa słužbie. U jaho byli padnačalenyja.
«Źviedaŭšy napačatku ciažkaści, jon navučyŭsia brać ad žyćcia ŭsio, što jano mahło jamu prapanavać. Usio, što jon mieŭ, było jahonym», — kaža Volha i dadaje:
«Kali Alaksandar staŭ na nohi, to ŭ Ameryku zabraŭ brata ź siamjoj i maci. U jaho byli plany na žyćcio. Jon sustreŭ dziaŭčynu. Prapanavaŭ joj vychodzić za jaho. Tolki vyjšaŭ z adpačynku. I tut takaja trahiedyja».
Alaksandra pachavajuć u Amerycy
Maci, brat Alaksiej i jahonaja siamja ciapier u šoku, praciahvaje Volha. Pavodle jaje, 1 červienia byŭ dzień pamiaci brata. Jahony dom byŭ poŭny siabroŭ i kaleh. «Maci ni na sekundu nie pakidajuć adnu. Šmat chto prapanuje dapamohu».
Volha sama dva dni nia moža suniać śloz. Havoračy pra brata, strymlivajecca, kab nie raspłakacca. Kaža, što nia moža pavieryć i źmirycca z tym, što Alaksandra ŭžo niama.
«My nie nastolki byli blizkimi ź im, jak brat i siastra, ale dziacinstva pryvodzili razam na leciščy ŭ babuli. Možna skazać, raśli adno ŭ adnaho na vačach», — kaža ŭ kancy hutarki Volha.
Pavodle jaje, pachavajuć Alaksandra ŭ Amerycy. Volha kaža, što maci Alaksandra i jahony brat Alaksiej naŭrad ci ŭžo viernucca ŭ Biełaruś.
Što viadoma pra trahiedyju i napadnika
12 čałaviek zahinuli paśla taho, jak municypalny słužačy ŭvajšoŭ u pamiaškańnie administracyi horadu Virdžynija-Bič i raspačaŭ tam stralaninu. Čatyry čałavieki byli dastaŭlenyja ŭ lakarniu z ranieńniami.
Amerykanskija ŚMI paviedamlajuć, što napadnik byŭ zabity ŭ pierastrełcy z supracoŭnikami palicyi. U złačynstvie padazrajecca 40-hadovy Deŭin Kredak, jaki byŭ uzbrojeny pistaletam i paŭaŭtamatyčnaj strelbaj.
Padčas stralaniny ŭ budynku było kala 400 čałaviek. Pavodle dadzienych palicyi, cieła adnaho zabitaha było znojdziena ŭ aŭtamabili pobač z budynkam, astatnija — na troch pavierchach municypalitetu.
«Heta samy žudasny dzień u historyi Virdžynii-Bič», — zajaviŭ mer horadu Bobi Dajer.
Miesca niadaŭniaj ataki strałka ŭ Pitsburhu.
Pavodle papiarednich dadzienych, zbroja, ź jakoj stralaŭ naŭmyśnik, była nabytaja lehalna. U vodhukach na masavaje zabojstva palityki ad Demakratyčnaj partyi znoŭ zapatrabavali zrabić bolš žorstkim zakanadaŭstva, spasyłajučysia na šmatlikija vypadki stralby ŭ publičnych miescach.
