Były vajskoviec Mirasłaŭ Marček, jaki padazrajecca ŭ zabojstvie słavackaha žurnalista Jana Kuciaka i jaho niaviesty Marciny Kušniravaj, zajaviŭ, što zakazčykam zabojstva byŭ ruskamoŭny nieviadomy mužčyna, paviedamlaje słavackaje vydańnie Noviny.
Infarmacyju pra toje, što zakazčykam byŭ inšaziemiec, Marček daviedaŭsia ad inšaha padazravanaha ŭ zabojstvie Zołtana Andrusko. Pra heta Marček zajaviŭ u svaich pakazańniach śledčym 11 krasavika.
Raniej Marček pryznaŭsia, što mienavita jon stralaŭ u žurnalista i jaho niaviestu.
Voś što Marček adznačyŭ u svaich pakazańniach: «Zołtan Andrusko skazaŭ, što hety zakaz — dla adnaho jaho znajomaha, ruskaha, jaki drenna razmaŭlaje pa-słavacku. Jon kazaŭ, što spadar źjaŭlajecca žurnalistam i piša niekatoryja rečy, jakija jamu nie padabajucca».
Takija pakazańni Marčeka zabłytvajuć spravu, bo abvinavačvańnie ŭ zahadzie zabić Kuciaka było vyniesiena nabližanamu da ŭłady multymiljanieru Marjanu Kočnieru.
Jan Kuciak i jaho niaviesta Marcina Kušnirava byli zabityja 21 lutaha 2018 hoda. Rezanansnaje zabojstva vyklikała vialikija pratesty ŭ Słavakii, paśla čaho premjer-ministr Robiert Fico, ministr unutranych spraŭ Robiert Kaliniak i kiraŭnik palicyi Cibar Haspar byli vymušanyja padać u adstaŭku.
