Ceny na kłubnicy apuścilisia da histaryčnaha minimumu. U sialan aptaviki skuplajuć ich pa 20 kapiejek za kiłahram. Heta nie vypadkova: mnohija fiermiery Bieraściejščyny pieraaryjentavalisia na kłubnicy z malin, i rynak pierasyciŭsia. Pradprymalnyja sialanie šukajuć ciapier inšyja nišy.
Maliny rasčaravali bieraściejskich sialan. Minskija aptaviki kuplajuć tanna, a na rynki Maskvy i Piciera ciažka prabicca i dajechać. Maliny — tavar kapryzny, zusim nie lažać.
Fiermier Vadzim Łłojd z Drahičynskaha rajona raskazaŭ «Našaj Nivie», što mnohija jaho kalehi prosta admovilisia ad vyroščvańnia malin:
«Mnoha chto na hety hod zaaraŭ svaje płantacyi. Ja pakul trymajusia, ale tryvoha ŭsio ž jość. U Biełarusi niedastaje tych, chto zajmajecca pierapracoŭkaj maliny. Isnujuć adzinkavyja dziaržaŭnyja kansiervavyja zavody, ale jany prapanoŭvajuć takuju miziernuju zakupačnaju canu, što praściej sapraŭdy vykinuć tuju jahadu», — kaža Vadzim Łłojd.
Bolšaja častka ŭradžaju nakiroŭvajecca ŭ Rasiju. Ale «sioleta na miažy z Rasijaj jość peŭnyja prablemy.
Ciapier rasijski bok patrabuje fita-sanitarnaje paśviedčańnie, a nie ŭsie fiermiery paśpieli jaho aformić. Tamu na miažy čarha. A naš tavar vielmi dalikatny.
Naprykład, kali pojduć daždžy, maliny robiacca vadzianistyja. Niekalki hadzin — i jany pakryvajucca ćvillu. Dajazdžajuć da kupca, jon hladzić na ŭsio heta, i, viadoma, admaŭlajecca. Chacia za malinami praściej dahladać, čym za kłubnicaj. Było b kamu pradavać. U roźnicu taksama niama sensu hetym zajmacca. Nu kolki ty toj jahady paśpieješ pradać?» — raskazvaje fiermier.
Fiermier Łłojd maje sioleta 4 hiektary kłubnic i 5 — malin.
Fiermiery vioski Simanavičy Drahičynskaha rajona ad malin taksama pieravažna admovilisia. Pierajšli na kłubnicy — u zakrytym hruncie, rannija. A taksama durnicy.
Rastuć płantacyi durnic i ŭ Ivacevickim, Bresckim rajonach. Durnicy ložkija i — na siońnia — papłatnyja. Ale ich moža sabie dazvolić toj, chto maje abarotnyja srodki: projdzie niekalki hadoŭ, pierš čym kuściki pačynajuć paŭnavarta radzić. Ahratechnika ich śpiecyfičnaja — jany lubić kisłyja hleby — ale nie składanaja. Praŭda, jany patrabujuć dadatkovaha palivu, fiermiery adrazu staviać palivalnyja sistemy.
Inšaja fiermierka z Drahičynskaha rajona Natalla Kot taksama zakłapočanaja situacyjaj, ale na ŭnutranym rynku krainy.
«Ja nie pracuju z Rasijaj, tamu nie viedaju, što tam u ich na miažy, ale pa sabie adčuła, što sioleta jak nikoli ciažka zdać kłubnicy miascovym zakupščykam. Ceny padajuć štodzień. Praŭda, ja pieršy hod baču, što rynak nastolki pierapoŭnieny kłubnicami».
Što datyčycca malinaŭ, to fiermierka paćviardžaje, što mnohija, sapraŭdy, zavorvajuć malińniki.
«Niavyhadna. Malinu to zalije, to jana vyharyć.
Zamiest maliny my sadzim rańniuju bulbu. Voś za čym budučynia fiermierskich haspadarak Biełarusi. Paśla taho jak jaje ŭradžaj prybirajem, na hetyja pali vysadžvajem piekinskuju kapustu. Takim čynam, źbirajem pa dva ŭradžai z adnaho pola na hod», — dzielicca Natalla Kot.
Fiermiery Bieraściejščyny paśpiachova zabiaśpiečvajuć Biełaruś jahadami i harodninaj, častka pradukcyi idzie na rasijski rynak. Heta ŭžo daŭno nie drobnyja haspadarki z ručnoj pracaj. Sialanie pierajmajuć technałohii ŭ palakaŭ i niemcaŭ, pracujuć z najlepšymi jeŭrapiejskimi sartami.
Fiermierskaja hapadarka «ŠulžykAhra» ź vioski Vulka Drahičynskaha rajona sadzić 30 hiektaraŭ kłubnic, 15 ha malin, zajmajecca taksama durnicami.
Mnohija raniej hadavali žyviołu. Ciapier adraklisia: u hetaj śfiery vialikija KSUPy (kalektyŭnyja sielskahaspadarčyja unitarnyja pradpryjemstvy) bolš efiektyŭnyja. A voś harodnina i jahady zastajucca siehmientam, dzie fiermierskija haspadarki demanstrujuć vydatnuju prystasavalnaść i hnutkaść.
