Być biełarusam — u pieršuju čarhu značyć atajasamlivać siabie ź biełaruskim narodam i mieć dałučanaść da jahonych kulturnych tradycyj, niezaležna ad etničnaha pachodžańnia, hramadzianstva abo miesca žycharstva. Mienavita hety pastułat u čarhovy raz padćvierdzili šmatlikija ŭdzielniki śviatkavańnia Kupalla, jakoje adbyłosia ŭ noč z 22 na 23 červienia ŭ štacie Ńju-Jork.

Aprača niepasrednych žycharoŭ miehapolisa i vakolic, na imprezu źjechalisia hości jašče z čatyroch susiednich štataŭ. U biahučym hodzie mierapryjemstva akazałasia samym masavym za apošniaje dziesiacihodźzie adznačeńnia Kupalla ŭ ZŠA. I staryja, i małyja achvotna bavili čas na pryrodzie, častavalisia dranikami i admysłova pryhatavanym krupnikam, brali ŭdzieł u viasiołych hulniach i demanstravali svaju daśviedčanaść na ŭroku biełaruskaj movy, udzielničali ŭ karahodzie i skokach praz vohnišča, šukali paparać-kvietku i kupalisia pry śviatle zorak. Jak zvyčajna, bolšaść prysutnych była apranuta ŭ nacyjanalnyja stroi, što dbajna zachoŭvaje spadarynia Valancina Jakimovič.

Pryjemnaj niespadziavankaj akazaŭsia akustyčny vystup niadaŭna stvoranaha amierykanskimi biełarusami hurta KAZINAK. A mierkavańnie nakont taho, što našy ludzi redka ŭśmichajucca i słaba prajaŭlajuć emocyi ź lohkaściu było abvierhnuta — mnostva pryhožych tvaraŭ prosta śviaciłasia ad ščyrych uśmiešak, a žartaŭlivyja hutarki doŭžylisia da ranicy.

Z ulikam taho, što Kupalle sa staražytnych časoŭ bieź pierabolšvańnia źjaŭlajecca śviatam, jakoje lubiać i šanujuć biełarusy z samymi roznymi žyćciovymi pohladami i vieravyznańniami, jahonaje śviatkavańnie daŭno ŭžo mahło b stać našym svojeasablivym nacyjanalnym brendam i paśpiachova raspaŭsiudzicca amal pa ŭsim śviecie, jak heta, u pryvatnaści, adbyłosia ź irłandskim Dniom Śviatoha Patryka.

A pakul što, dziakujučy namahańniam arhanizataraŭ — abjadnańniu «Pahonia» i supołcy «Biełarusy ZŠA. Razam lahčej» — ramantyčnyja kupalskija zvyčai z kožnym hodam abjadnoŭvajuć usio bolš ziemlakoŭ, jakija pražyvajuć na amierykanskim kantyniencie i nie chočuć hublać poviaź ź biełaruščynaj.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?