U Minsku ahučyli prysud 13 hramadzianam, jakija pa fiktyŭnych daviedkach ab zarpłacie atrymlivali kampiensacyi za zdaču kryvi. Pra rašeńnie paviedamlaje tut.by sa spasyłkaj na pres-słužbu Viarchoŭnaha suda.
Uletku 2018 h. Śledčy kamitet paviedamiŭ, što 13 čałaviek zdavali kroŭ i atrymlivali kampiensacyju za propusk pracy pa padroblenych daviedkach pra zarobak. Dakumienty byli vypisanyja nibyta z čatyroch miescaŭ, dzie jany pracavali, ale ličby byli vydumanyja. Padziei datujucca 2014-2018 hadami, ahulnaja suma skłała 56 tysiač rubloŭ. Nahadajem, ź minułaha hoda abmiarkoŭvajecca ideja zrabić zdaču kryvi całkam biaspłatnaj.
Prysud pa spravie sud Centralnaha rajona vynies 21 červienia, usich fihurantaŭ abvinavačvali ŭ machlarstvie.
Dvoje abvinavačanych mužčyn z najbolšymi sumami prysudžanyja da 4,5 i 4 hadoŭ pazbaŭleńnia voli z kanfiskacyjaj usioj majomaści. Ale da ich užyli adterminoŭku. Pry hetym jany pavinny ŭ volny čas adpracavać 120 hadzin hramadskich rabot.
Jašče troje asudžanyja na 3 hady pazbaŭleńnia voli, taksama z adterminoŭkaj i 100 hadzinami hramadskich rabot.
Astatnija vosiem čałaviek asudžanyja na terminy ad 1,5 da 2,5 hadoŭ abmiežavańnia voli biez nakiravańnia ŭ papraŭčyja ŭstanovy.
Prysud jašče nie ŭstupiŭ u zakonnuju siłu i moža być abskardžany.
