28 červienia Viciebski abłasny sud u zakrytym sudovym pasiadžeńni razhledzieŭ kryminalnuju spravu ab zabojstvie žančyny ŭ Loźnienskim rajonie, paviedamlaje tut.by sa spasyłkaj na pres-słužbu Viarchoŭnaha suda. U vieraśni minułaha hoda cieła 28-hadovaj viciablanki znajšli ŭ lesie.
Śledčyja vyśvietlili, što žančyna adpačyvała ŭ svajoj kvatery sa znajomymi, a paśla zastolla adpraviłasia ŭ les z dvuma ź ich, mužčynam i žančynaj. Ekśpierty zajavili, što žančynu pachavali žyŭcom. Abvinavačvańni ŭ zabojstvie pry abciažvajučych abstavinach byli vystaŭlenyja 21-hadovamu mužčynu (raniej jaho sudzili za kradziež mašyny) i 24-hadovaj žančynie. Usiaho pa spravie byli zatrymanyja čatyry čałavieki.
Matyvam zabojstva było žadańnie zavałodać kvateraj žančyny: abvinavačvany raźličvaŭ zdavać jaje i paśla śmierci haspadyni navat raźmiaściŭ adpaviednuju abjavu na śpiecyjalizavanym sajcie.
Abvinavačanyja 21-hadovy mužčyna i 24-hadovaja žančyna pryznanyja vinavatymi ŭ naŭmysnym zabojstvie, učynienym z asablivaj žorstkaściu, z karyślivych mierkavańniaŭ, hrupaj asobaŭ. Mužčynu pa sukupnaści złačynstvaŭ (zabojstva, złosnaje chulihanstva, rabavańnie, vyrab parnahrafii i inš.) asudzili na 22 hady pazbaŭleńnia voli ŭ kałonii ŭzmocnienaha režymu z kanfiskacyjaj majomaści i štraf 980 rubloŭ. Žančynu asudzili na 17 hadoŭ pazbaŭleńnia voli ŭ kałonii ahulnaha režymu i kanfiskacyju majomaści. Ź ich taksama budzie spahnana kampiensacyja maralnaj škody na karyść dvuch paciarpiełych - pa 36 000 rubloŭ kožnamu.
Jašče dvoje abvinavačanych, jakija prachodziać pa spravie, - 24-hadovyja mužčyna i žančyna. Ich pryznali vinavatymi ŭ vyrabie i raspaŭsiudzie parnahrafičnych materyjałaŭ i złosnym chulihanstvie dy asudzili na try hady pazbaŭleńnia voli z adterminoŭkaj pakarańnia na dva hady. Mužčyna jašče atrymaŭ štraf 110 bazavych vieličyń.
