Prezident Ukrainy Uładzimir Zialenski padpisaŭ ukaz «Ab prysvajeńni zvańnia Hieroj Ukrainy» trom likvidataram avaryi na Čarnobylskaj atamnaj elektrastancyi, što spuskali vadu pad reaktaram, piša bbc.com.
Kadr ź sieryjała «Čarnobyl» NVO. U filmie Ananienka, Baranaŭ i Biaspałaŭ spuskajucca ŭ akvałanhach. Nasamreč jany byli ŭ hidrakaściumach z reśpiratarami.
Zvańnie prysvojena staršamu inžynieru-miechaniku reaktarnaha cecha ČAES Alaksieju Ananienku, staršamu inžynieru turbinnaha cecha AES Valeryju Biaspałavu i načalniku źmieny AES Barysu Baranavu (paśmiarotna).
Alaksiej Ananienka, Valeryj Biaspałaŭ i Barys Baranaŭ spuścilisia ŭ basiejn pad razburanym reaktaram i adkryli zapornyja kłapany, kab vyzvalić jaho ad vady.
Dziakujučy hetamu, udałosia paźbiehnuć kantaktu raspłaŭlenaha jadziernaha materyjału z vadoj, u vyniku jakoha z vysokaj vierahodnaściu moh adbycca paŭtorny vybuch na ČAES, zajavili ŭ Ofisie prezidenta Ukrainy.
Hetyja ludzi «ŭhanaravanyja najvyšejšaj dziaržaŭnaj uznaharodaj za hieraizm i samaaddanyja dziejańni padčas likvidacyi avaryi na Čarnobylskaj AES», havorycca ŭ tekście ŭkazu.
Sieryjał «Čarnobyl», jaki vypuścili niadaŭna kampanii HBO i Sky, staŭ miehapapularnym va ŭsim śviecie i pryciahnuŭ uvahu da padziej krasavika 1986 hoda. U sieryjale scena spusku troch «likvidataraŭ» Ananienka, Biaspałava i Baranava ŭ radyjeaktyŭnuju vadu pad reaktaram ČAES stała adnoj z samych jarkich i dramatyčnych.
Apisvajučy ŭ sieryjale niebiaśpieku mahčymaha novaha vybuchu i nieabchodnaść adpraŭleńnia vadałazaŭ pad reaktar, prafiesar Valeryj Lahasaŭ ŭ razmovie z hiensakam KPSS Michaiłam Harbačovym paprasiŭ u jaho dazvołu «zabić troch čałaviek». Taki dazvoł ad Harbačova jon atrymaŭ.
Taksama ŭ sieryjale pakazali, jak šukali dobraachvotnikaŭ dla hetaj zadačy i jak potym sustrakali ich apładysmientami.
Realny ŭdzielnik tych padziej Alaksiej Ananienka raspavioŭ, što jamu patelefanavali i pastavili zadaču - adpampavać vadu z-pad reaktara.
«Sama apieracyja prajšła chutka i biez uskładnieńniaŭ», - skazaŭ Ananienka. Adnak, vadałazam davodziłasia prachodzić učastki ź vielmi vysokim «radyjacyjnym ciskam», u pryvatnaści la ŭvachodu ŭ transpartny kalidor razburanaha 4 błoka.
A paśla ich vychadu vonki nichto nikomu nie apładziravaŭ, uspaminaje Ananienka.
«Heta była zvyčajnaja praca, chto budzie apładziravać? Hierojami nie pačuvalisia, adčuvali siabie jak zvyčajna», - adznačyŭ spadar Ananienka.
Raniej byŭ pašyrany mif, što «čarnobylskija dajviery» pamierli ad pramianiovaj chvaroby. Ale heta nie tak. Paśla spusku pad reaktar iany praciahvali pracavać na ČAES.
Barys Baranaŭ pamior u 2005 hodzie, a Valeryj Biaspałaŭ i Alaksiej Ananienka žyvuć pa susiedstvie ŭ kijeŭskim mikrarajonie Traješčyna.
Na Čarnobylskaj AES Ananienka prapracavaŭ da 1989 hoda, zatym pierajšoŭ na pracu ŭ inšyja arhanizacyi, źviazanyja z atamnaj enierhietykaj i biaśpiekaj.
Jašče ŭ savieckija časy jon atrymaŭ «Znak pašany», a u 2018 hodzie prezident Ukrainy Parašenka ŭznaharodziŭ jaho ordenam «Za mužnaść» III stupieni.
Zrešty, čałaviek, jaki pieražyŭ spusk pad 4 reaktar ČAES, paciarpieŭ užo ŭ Kijevie - u 2017 hodzie jaho na piešachodnym pierachodzie źbiła mašyna. Jon atrymaŭ ciažkuju traŭmu hałavy i nahi, bolš za miesiac byŭ u komie. Alaksiej Michajłavič zmoh adnavicca, choć na pracu ŭžo nie viarnuŭsia.