Technałohii zastrašvańnia raspracavanyja daskanała, — raskazvaje Vadzim Sarančukoŭ. — kab trapić na mitynh, treba prajści čatyry kardony AMAPa, a vadamioty padklučajuć da vadapravoda na vačach u mitynhoŭcaŭ.
Vadzim Sarančukoŭ — namieśnik staršyni Partyi BNF, adzin z arhanizataraŭ śviatkavańnia Dnia Voli — 2019 u Horadni. 3 žniŭnia spadar Sarančukoŭ vystupiŭ na mitynhu rasijskaj apazicyi ŭ Sankt-Pieciarburhu. Palityk raskazaŭ «Našaj Nivie», što jon pabačyŭ tam i ź jakimi adčuvańniami viarnuŭsia z Rasii.
«Pieršaje, što kinułasia ŭ vočy — heta jak adkatanyja ŭ Biełarusi technałohii pierakinuli na Rasiju. U 2010 hodzie ŭ Biełarusi razhaniali tysiačy ludziej, ciapier heta ŭsio bačym u Rasii.
Pratesty ŭ Rasii vyklikała farmiravańnie vybarčych kamisij. U Biełarusi ŭžo daŭno pradstaŭnikoŭ alternatyŭnych kandydataŭ nie puskajuć u kamisii, to ŭ Rasii heta pačynajecca tolki ciapier. Kamisii stanoviacca absalutna bieskantrolnymi.
U nas užo daŭno nie rehistrujuć kandydataŭ pa vydumanych pryčynach. Ja zhadvaju parłamienckija vybary 2004 hoda, kali barysaŭskaha aktyvista Siarhieja Sałaša nie rehistrujuć pa pryčynie niesapraŭdnych podpisaŭ. Jon padaje ŭ sud, pryciahvaje ŭ sud ludziej, jakija kažuć, što ich podpisy sapraŭdnyja. A sudździa adkazvaje, nie, niesapraŭdnyja.
Pryblizna toje samaje ciapier u Rasii. Mnohija kandydaty prosta nie mohuć padać dakumienty na rehistracyju, bo ŭ čarhu pierad imi stanoviacca piać-šeść dužych chłopcaŭ, jakija zabivajuć uvieś pracoŭny čas kamisii. U vyniku čaho niezaležnyja kandydaty prosta nie mohuć addać dakumienty.
Ja nie pamiataju takoj kolkaści siłavikoŭ užo vielmi daŭno. Zapałochvańnie idzie kałasalnaje. Kali na sam mitynh prychodzić da tysiačy čałaviek, to AMAPa, aŭtamatčykaŭ u dvarach bolš za 10 tysiač čałaviek. Pa pierymietry stajać tak zvanyja «kasmanaŭty» (u šlemach), a ŭ dvarach chodziać uzbrojenyja ludzi.
Prosta pierad ludźmi adčyniajuć vadapravodnyja luki dy padklučajuć vadamioty tolki dla taho, kab usie bačyli, što jany jość.
Doŭhi čas u Rasii nie było ramak-mietałašukalnikaŭ. Ciapier ža, kab trapić na mitynh, to treba prajści try kardony AMAPa, mietałašukalnik, a potym jašče ŭnutrany pierymietr AMAPa. Heta zroblena dla taho, kab u zvyčajnaha čałavieka, jaki prosta prachodziŭ mima i zachacieŭ dałučycca, adbić takoje žadańnie całkam. Na moj pohlad, heta dziejničaje, bo ja bačyŭ šmat ludziej, jakija stajali za hetym pierymietram, ale nie ryzyknuli dałučycca.
Navat mnie, užo daśviedčanamu ŭ hetym płanie čałavieku, było niajomka, kali bačyš takuju karcinu, kaža 39-hadovy Vadzim Sarančukoŭ. — Zrešty, strach — heta narmalny stan arhanizma. Nie bajacca tolki idyjoty.
Ja byŭ u Piciery pa zaprašeńni adnaho sa svaich dobrych znajomych, jaki arhanizoŭvaŭ mitynh. Heta była akcyja salidarnaści z zatrymanymi ŭ Maskvie 27 lipienia. Pazicyja Partyja BNF u tym, što takija dziejańni niedapuščalnyja nidzie — ni ŭ Biełarusi, ni ŭ Rasii, ni ŭ Polščy, ni va Ukrainie.
Liču rasijskich pratestoŭcaŭ krychu ramantyčnymi. Sprava ŭ tym, što ja čuŭ tam rezalucyi nakštałt taho, što naša ŭłada nas pačuje. My heta ŭsio prachodzili. Kali ŭłada vykarystoŭvaje takija siły suprać dazvolenaj akcyi, to, paviercie, jana nie hatovaja słuchać rezalucyi.
Kab zdušyć u sabie napružanaść, to ja padychodziŭ da ludziej i pytaŭsia, čyj Krym. Mnie cikava było daviedacca, chto jany takija rasijskija apazicyjaniery. Jość, kaniečnie, asoby, jakija aceńvajuć Biełaruś i Ukrainu jak śfieru ŭpłyvu Rasii. Ja nie čaplaŭsia asabliva, ale absalutnaja bolšaść adkazvała z uśmieškaj na vusnach: «Kaniečnie, ukrainski».
Asabista ja padčas svajho vystupu kazaŭ pra salidarnaść z zatrymanymi, pra paraleli miž Biełaruśsiu i Rasijaj, što ŭ nas zabivali palitykaŭ, nie dapuskajuć kanydataŭ da vybaraŭ. Skončyŭ słovami Papy Jana Paŭła II: «Nie bojciesia». Taksama skazaŭ «Žyvie Biełaruś» i «Rasija budzie svabodnaj».
U mianie niama spadzievu, što rasijskaja administracyja budzie prysłuchoŭvacca da pratestoŭcaŭ».
