«Pałačnuju sistemu treba mianiać, bo za pałkami i za ptušačkami nie bačna ludziej», — pra heta raskazaŭ karespandentu «Našaj Nivy» ministr unutranych spraŭ Juryj Karajeŭ padčas adkryćcia pomnika zahinułym u vajnie voinam Čyrvonaj armii pad Minskam.

Pa słovach ministra, asnoŭnaja prablema ŭ tym, jak vypracavać novy kryter.

«Luby čałaviek musić być acenieny za svaju rabotu. Kali idzie razmova pra jakaść pracy, to za kožnaj kryminalnaj spravaj, za kožnym zvarotam — čałaviečy los, a heta važniej za lubyja pałki», — miarkuje Juryj Karajeŭ.

Ministr pryvioŭ paralel: na zavodzie ad rabotnikaŭ patrabujuć, kab jon zrabiŭ peŭnuju kolkaść detalaŭ. U milicyi časam anałahična: patrabujuć i raskryćcia peŭnaj kolkaści złačynstvaŭ, i razhladu zvarotaŭ hramadzian. Ale heta nie hałoŭnaje.

Jon spadziajecca, što budzie ŭviedziena balnaja sistema — kali za raskryćcio značnaha karupcyjnaha złačynstva, jakoje naniesła vialikuju škodu hramadstvu, hetych bałaŭ naličycca bolš.

Pa słovach Karajeva, isnujuć sotni drobnych i lohkadasiahalnych spraŭ ź niejkaj pobytavaj drabiazoj: doktaru dali plašku kanjaka ci nastaŭniku tort. «Ale nie varta haniacca za takimi pakazčykami», — padkreśliŭ ministr.

«Ale nie moža być i takoha: što ty zrabiŭ adnu vialikuju spravu, zastałosia šmat svabodnaha času, a ty siadziš i dumaješ, ničoha nie robiš. Hałoŭnaje — i jakaść adpracoŭki materyjału, i kab ludzi nie zastalisia pakryŭdžanymi», — miarkuje Karajeŭ.

«Nie tolki ja, ale i kiraŭnik dziaržavy, i ludzi dajuć nam taki pasył! Usio toje, što jość ŭ kamientarach, u tym liku na niezaležnych vydańniach ci navat na apazicyjnych, ja ŭvažliva čytaju, sprabuju zrazumieć i prapuścić praź siabie hradus nastrojaŭ ludziej i hramadstva», — tłumačyć Juryj Karajeŭ.

«Ja nikoli nie kažu «aj, tam pišuć pakryŭdžanyja ci kamu niama čaho rabić. Ci «kanapavyja vojski» — ja nikoli tak ludziej nie nazyvaju, — reziumuje ministr. — Tam pišuć davoli piśmiennyja ludzi. Ich acenka dla mianie vielmi šmat značyć, i ja da jaje prysłuchoŭvajusia».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?