Deputatka Pałaty pradstaŭnikoŭ, kiraŭnica Tavarystva biełaruskaj movy Alena Anisim nie prajšła rehistracyju pa Staŭbcoŭskaj akruzie №70, pra heta «Našaj Nivie» paviedamili ŭ akruhovaj vybarčaj kamisii.

«Admovili praz drobnyja techničnyja momanty, — raskazała «NN» Alena Anisim. — My mahli źbirać podpisy tolki ŭ Staŭbcoŭskim rajonie, ale ŭ padpisnych listach niekatoryja zborščyki nie ŭkazvali Staŭbcoŭski rajon, chacia tam byli paznačanyja i vioska, i nazva vulicy. Ja dumaju, što heta zroblena dla taho, kab pakazać, jakija dobryja śpiecyjalisty pracujuć u vybarčych kamisijach, jak dakładna jany viedajuć zakanadaŭstva, jak detalna raźbirajuć listy».

Anisim nie vieryć, što kamanda admović joj u rehistracyi mahła sychodzić adniekul źvierchu. «Nie dumaju, što takoje mahčyma», — skazała jana. Ciaham troch dzion Anisim płanuje abskardzić hetaje rašeńnie.

Fiermieru Juryju Ivanoŭskamu, jaki taksama vyłučaŭsia pa hetaj akruzie praz zbor podpisaŭ, taksama admoŭlena ŭ rehistracyi.

Hannu Kanapackuju taksama nie zarehistravali. «Ja tolki što vyjšła z pasiadžeńnia kamisii. Mianie nie zarehistravali ŭ jakaści kandydata ŭ deputaty», — paviedamiła jana.

Deputatka Hanna Kanapackaja nie zarehistravanaja ŭ jakaści kandydata pa Kastryčnickaj akruzie Minska. U kamientary «NN» spadarynia Hanna raskazała, što jaje nie zarehistravali praz banalnyja apiski ŭ błankach. «Naprykład, ludzi pisali nie 2019, a 2009 hod. Ci nie dziaviaty miesiac, a dziasiaty. Zrazumieła, što heta prosta apiski».

«Što kazać, kali kiraŭnictva partyi [AHP — «NN»] zrabiła ŭsio mahčymaje, kab ja nie stała kandydatkaj. Ja nie sumniavałasia, što ŭłady skarystaje šaniec nie zarehistravać mianie praz zbor podpisaŭ. I Labiedźka zrabiŭ usio mahčymaje dla hetaha. Kali Anatol Uładzimiravič kryčyć, što jon za svabodnyja vybary, to jon sam pachavaŭ hetuju inicyjatyvu, bo mienavita ja była raspracoŭščykam źmien u vybarčaje zakanadaŭstva».

Hanna Kanapackaja płanuje abskardzić rašeńnie akruhovaj kamisii, ale nie vieryć, što heta daść plon.

Nie zarehistravany i patencyjny kandydat u prezidenty, lidar ruchu «Za svabodu» Juryj Hubarevič.

«Pa papiarednich źviestkach u rehistracyi admoŭlena. (…) Ale takoj admovaj CVK streliła sabie ŭ nahu, dajučy mnie mahčymaść vystupu pa TV u jakaści davieranaj asoby dziasiatkaŭ kandydataŭ ad Ruchu «Za svabodu», — napisaŭ jon u fejsbuku.

Nie zarehistravanaja i rezki krytyk Alaksandra Łukašenki, žurnalistka Iryna Chalip.

Iryna Chalip adreahavała nastupnym čynam: «Niaŭžo vy čakali, što mianie zarehistrujuć? Admovili ź jašče bolš niedarečnych pryčyn, čym Navalnamu i Sobal u Maskvie. U ich nie było pretenzij da praŭdzivaści podpisaŭ. Ale, uvaha, daty na błankach byli prastaŭlenyja inšaj rukoj!»

Rašeńnie ab nierehistracyi Iryna Chalip abskardžvać nie źbirajecca.

A voś Ryhor Kastusioŭ zarehistravany pa Kupałaŭskaj akruzie. Pryčym, raskazaŭ jon «Našaj Nivie», u jaho adznačyli vysokuju jakaść dakumientaŭ.

Lidar kampanii «Havary praŭdu» Andrej Dźmitryjeŭ zarehistravany ŭ jakaści kandydata pa Dziaržynskaj vybarčaj akruzie. Dźmitryjeŭ taksama išoŭ na vyłučeńnie šlacham zboru podpisaŭ.

«Praviarali 200 podpisaŭ. Vielmi pilna, mnie zvanili ludzi, jakija dumali, što heta robicca dla taho, kab mianie nie zarehistravać. U vyniku znajšli tolki adzin podpis ź niesapraŭdnymi pašpartnymi danymi», — raskazaŭ «NN» Dźmitryjeŭ.

Pa słovach Dźmitryjeva, pa krainie ŭžo viadoma, što nie zarehistravali troch pradstaŭnikoŭ «Havary praŭdu»: Illu Bahdanava ŭ Połacku, Andreja Bohdzieleva ŭ Mahilovie i Natallu Šarypa ŭ Viciebsku.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?