Ministerstva abarony ZŠA apublikavała videazapisy apieracyi, u vyniku jakoj byŭ zabity lidar ekstremisckaj hrupoŭki «Isłamskaja dziaržava» Abu Bakr al-Bahdadzi, a taksama padzialiłasia z žurnalistami detalami rejdu ŭ siryjskaj pravincyi Idlib, piša bbc.com.

Jak raspavioŭ kiraŭnik Centralnaha kamandavańnia Uzbrojenych sił ZŠA (CENTCOM) Kenet Makienzi, usiaho padčas apieracyi byli zabityja šeść bajevikoŭ, u tym liku čatyry žančyny.

«Byli pryniaty ŭsie nieabchodnyja miery, kab paźbiehnuć achviar siarod mirnaha nasielnictva, a taksama abaranić dziaciej, jakija, pavodle našych acenak, znachodzilisia na abjekcie. Piać členaŭ ID na terytoryi abjekta byli niebiaśpiečnyja dla sił śpiecnaza, jany nie reahavali na kamandy na arabskaj skłaści zbroju. Jany byli zabityja, siarod ich byli čatyry žančyny i adzin mužčyna», - adznačyŭ Makienzi.

Pavodle jaho słoŭ, lidar ID Abu Bakr al-Bahdadzi padarvaŭ siabie z dvuma dziećmi, a nie tryma, jak paviedamlałasia raniej. Dzieciam, vierahodna, było da 12 hadoŭ, raspavioŭ hienierał.

Jon taksama paviedamiŭ, što al-Bahdadzi sprabavaŭ schavacca ŭ tupikovym tuneli. Spačatku jon sprabavaŭ adstrelvacca adtul, adnak zatym padarvaŭ siabie.

Hienietyčny analiz paćvierdziŭ, što zabity byŭ mienavita al-Bahdadzi, dadaŭ Makienzi.

Na kadrach, jakija prademanstravali žurnalistam amierykanskija vajskoŭcy, vidać budynak, u jakim mierkavana znachodziŭsia lidar ID. Jaho atačajuć supracoŭniki śpiecnaza, paśla čaho bajeviki adkryvajuć ahoń pa amierykanskich siłach, jakija viaduć nastup z pavietra.

Padčas naziemnaj apieracyi śpiecnazaŭcy kanfiskavali dakumienty i elektronnyja pryłady. Paśla hetaha jany pakinuli abjekt i viarnulisia da viertalotaŭ z dvuma zatrymanymi.

«Paśla taho, jak našy siły biaśpiečna pakinuli abjekt, jany vykarystali vysokadakładnyja bojeprypasy, jakija prymianiajucca pa-za zonaj uździejańnia srodkaŭ parazy supiernika, kab razburyć abjekt i ŭsio, što ŭ im», - raspavioŭ žurnalistam Makienzi.

Na apublikavanych videazapisach taksama bačny momant udaru pa abjekcie z pavietra.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?