Studenty Minskaha inavacyjnaha ŭniviersiteta 11 listapada vyjšli na strajk. Jany aburanyja tym, što Ministerstva adukacyi nie praciahnuła akredytacyi na niekatoryja śpiecyjalnaści ŭ VNU. Ciapier studenty buduć vymušanyja davučvacca ŭ inšych navučalnych ustanovach.

Svaim bačańniem hetaj situacyi «Naša Niva» paprasiła padzialicca byłoha ministra ŭnutranych spravaŭ i sportu Juryja Sivakova, jon doŭhi čas byŭ prarektaram u MIU, tamu viedaje pra hety ŭniviersitet nie z čužych słovaŭ.

Čytajcie taksama: «U nas ministr — ideołah i kamunist, razumiejecie?» Student MIU raskazaŭ, jak jany arhanizavali strajk

«Naša Niva»: Juryj Leanidavič, vy doŭhi čas byli prarektaram u MIU. Što dumajecie nakont kanfliktu ŭ hetaj navučalnaj ustanovie?

Juryj Sivakoŭ: Ja vielmi dobra viedaju tuju sistemu kiravańnia ŭstanovaj adukacyi, jakuju kultyvuje i realizuje Mikałaj Vasiljevič Suša. Taja infrastruktura, jakaja stvoranaja va ŭniviersitecie, taja mietodyka navučańnia studentaŭ, jakaja tam isnuje, vielmi inavacyjnaja i sučasnaja.

Tam, u adroźnieńnie ad mnohich inšych navučalnych ustanovaŭ, dla studenta stvoranaja atmaśfiera, dzie jon adčuvaje siabie hodna: ad tualeta — da bufieta. Ja ciapier vykładaju ŭ Akademii kiravańnia, dyk heta prykładna adzin i toj ža ŭzrovień.

Pa-druhoje, Mikałaj Vasiljevič vielmi šmat jeździŭ za miažu, kab hladzieć, jak i dzie arhanizavany navučalny praces. Ja pryviadu adzin prykład: adździeł prahramavańnia, dyk tam supracoŭniki atrymlivali bolš, čym namieśniki rektara.

Plus da ŭsiaho Suša maje svoj punkt hledžańnia na mnohija pytańni i nie baicca jaho adstojvać. Jon sprabavaŭ inicyjavać i ŭkaranić stvareńnie adukacyjnaha chołdynhu — pačynajučy ad dziciačaha sadka i skančvajučy mahistraturaj. Usiaho jaho dziejnaść pa arhanizacyi navučalnaha pracesu zasłuhoŭvaje samaj lepšaj acenki i pavahi.

U dadzienaj situacyi z admovaj u akredytacyi peŭnych śpiecyjalnaściaŭ ja baču niejki subjektyŭny, ale nie abjektyŭny faktar. Ja viedaju tych ludziej, što tam pracujuć, i ja chaču skazać, što va ŭsim hetym lažyć niešta takoje, što pryniata kazać «nie dla druku».

«NN»: Moža, mieŭ miesca niejki kanflikt rektara i ministra adukacyi?

JUS: Ja nie byŭ śviedkam, ale mnie kazali, što Mikałaj Vasiljevič vielmi žorstka vykazvaŭ svaju pazicyju…

Naprykład, jość Ministerstva adukacyi, jano davodzić svaje ličby pryjomaŭ da VNU. Užo siońnia na 200 tysiač studentaŭ u krainie stała mienš praz tyja hipierinavacyi, jakija naša Ministerstva adukacyi ździajśniaje.

Majo bačańnie, jak byłoha čynoŭnika sa stažam, — rynak vyznačaje. U VNU jość licenzija. I kali ty maješ hetuju licenziju, to možaš nabirać studentaŭ, a nie čakać padkantrolnych ličbaŭ ministerstva. Studenty i ich baćki sami vyrašać, kudy abituryjentu iści vučycca. Nu chiba nie tak? My nie pavinny ni ŭ čym abmiažoŭvać ni VNU, ni studenta ŭ vybary. A my sprabujem usio rehulavać, pryčym vielmi niaŭkludna.

Mnie zdajecca, što Mikałaj Vasiljevič niekalki razoŭ vystupaŭ adnosna aptymizacyi pracesu kiravańnia ŭstanovaŭ adukacyi, za roŭnyja ŭmovy i pryvatnych ustanovaŭ adukacyi, i dziaržaŭnych. Kab nie było nijakaj dyskredytacyi. I hetymi svaimi słovami i dziejańniami jon staŭ krynicaj razdražnieńnia. Moh syhrać i hety faktar. Čamu? Bo sama sistema navučańnia, stvoranaja Sušam, była vartaja tolki pavahi. Treba spytać u tych studentaŭ i ich baćkoŭ, nakolki jany zhodnyja z hetym rašeńniem.

«NN»: Časta možna pačuć mierkavańnie, što adukacyja ŭ dziaržaŭnych VNU macniejšaja, čym u pryvatnych. Heta praŭda?

JUS: Niapraŭda. Ja pracavaŭ nie tolki ŭ MIU, ale i ŭ MITSA. Nie, takoj istotnaj roźnicy niama.

«NN»: U vas pra MIU zastalisia tolki dobryja ŭspaminy?

JUS: Kaniečnie. U siońniašniuju postyndustryjalnuju epochu nie «chaziain — baryn», jak było raniej, a «klijent — karol». I ŭ MIU hety student, jaki płacić hrošy, — karol. Usio rabiłasia tak kiraŭnictvam instytuta, kab studentu ŭ ścienach alma-mater było zručna i kamfortna.

U Sušy prybiralščyki pracujuć amal cełyja sutki. Studenty zajšli ŭ aŭdytoryju — usio prybrana, usio čysta. Tam usio demanstruje pavažnaje staŭleńnie da tych, chto płacić hrošy, chto ŭtrymlivaje administracyju i vykładčykaŭ. I heta sučasny padychod.

«NN»: Ci pravilna zrabili studenty, što pajšli na strajk?

JUS: Ja nie čytaŭ siońnia jašče navinaŭ, było try pary ŭ mianie. Toje, što studenty pajšli na heta, arhanizavali fłeš-mob hety, to nie dumaju, što hetyja pracesy kimści rehulavanyja i zrežysiravanyja. Chutčej za ŭsio, heta spantanny praces. Prosta studenty paličyli patrebnym vykazać svajo staŭleńnie da tych pracesaŭ, što adbyvajucca.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?