Chod pieramoŭ pa ŭzhadnieńni z Rasijaj «darožnych kart» pahłyblenaj intehracyi prakamientavaŭ u sieradu premjer-ministr Siarhiej Rumas na palach kanfierencyi «Raźvićcio kankurencyi na halinovych rynkach: tearetyčnyja i praktyčnyja aśpiekty», piša Tut.by.
Usiaho Biełaruś i Rasija abmiarkoŭvajuć 31 darožnuju kartu pahłyblenaj intehracyi.
— Kansultacyi iduć kožny dzień, kala pałovy kart uzhodniena praktyčna całkam. Kali nijakich navin nie źjavicca ŭ hetyja dni listapada, to hetyja karty hatovyja da padpisańnia ŭ pakiecie. Pa šerahu kart jość nieŭrehulavanyja pazicyi, u tym liku pa nafcie i pa hazie. Ale tam niama nievyrašalnych pytańniaŭ. Dumaju, u aŭtorak, paśla pasiedžańnia Saŭmina, my damovilisia z maim rasijskim kaleham Dźmitryjem Anatoljevičam prajścisia pa ŭsich hetych kartach i pasprabavać maksimalna źniać roznahałośsi. Prezidentam my nie možam vynieści toj błok roznahałośsiaŭ, jakija jość siońnia. Heta nie nievyrašalnyja pytańni, jany ŭstavali ŭ našych ŭzajemaadnosinach z Rasijaj i raniej. Dumaju, znojdziem raźviazki.
Na pytańnie ab tym, što rabić, kali raźviazak ŭsio ž taki premjery nia znojduć i Biełaruś zastaniecca, da prykładu, biez hazavaha kantraktu na 2020 hod, Rumas padkreśliŭ:
- Značyć, prezidenty pastaviać nam drennuju acenku za našu pracu i abaviazkova znojduć raźviazki!
Kamientujučy pieramovy pa darožnaj karcie, jakaja tyčycca Padatkovaha kodeksa, Rumas zapeŭniŭ, što darožnyja karty buduć padpisanyja, tolki kali intaresy Biełarusi buduć całkam uličanyja.
— Padatkovy kodeks — adna z samych składanych darožnych kart. Krainy hety čas samastojna raźvivali padatkovaje zakanadaŭstva, i za vielmi karotki pieryjad jaho unifikavać (a my nie havorym ab pierachodzie na rasijskaje ci biełaruskaje zakanadaŭstva), uziać usio lepšaje, što jość u kožnaj krainie, vielmi składana technična. Ale padatkovaja nahruzka ŭ Rasijskaj Fiederacyi našmat nižej. I pierachod dla našych subjektaŭ haspadarańnia na rasiejskija staŭki padatkaŭ byŭ by vialikim dabrom. Naturalna, uźnikajuć pytańni kampiensacyi vypadajučych dachodaŭ biudžetu. Dyskusija z Rasiejaj, chutčej, idzie pra heta — jak Biełaruś budzie kampiensavać tyja vypadajučyja prybytki, kab heta nie akazała niehatyŭnaha ŭpłyvu na ekanomiku, — skazaŭ Rumas.