president.gov.by
Alaksandr Łukašenka 14 listapada pryniaŭ z dakładam staršyniu Dziaržpahrankamiteta Anatola Łapo i dziaržsakratara Rady biaśpieki Stanisłava Zasia ab uzajemadziejańni Biełarusi i Rasii ŭ pamiežnych pytańniach, paviedamlaje pres-słužba.
Alaksandr Łukašenka źviarnuŭ uvahu, što pamiž pamiežnikami Biełarusi i Rasii prablem niama, pamiž vajennymi i transpartnikami taksama ŭsio hładka, ale kali ŭsie pytańni vyvodziacca na ŭradavy ŭzrovień, raptam źjaŭlajecca kuča pytańniaŭ.
«Jak vynik, nas pastajanna paprakajuć: «My ledź nie ŭtrymlivajem Biełaruś. Jana abryniecca, kali my jaje nie budziem datavać, utrymlivać». Treba paličyć, čaho nam kaštuje abarona sumiesnaj miažy. Nahadać im pra sistemu supraćpavietranaj abarony: jany doŭha prasili mianie, kab my zrabili jaje sumiesna. Ad Bałtyki da Čornaha mora my siońnia pracujem na Rasijskuju Fiederacyju. Heta taksama hrošaj kaštuje, i nie tolki hrošaj. i my ŭsio roŭna nachlebniki», — aburyŭsia jon.
Kiraŭnik dziaržavy nahadaŭ, što ciapier Biełaruś i Rasija viaduć pieramovy pa pahłybleńni intehracyi. Pavodle jaho słoŭ, usie pytańni, jakija ŭźnikajuć nieabchodna «źvieści, pakłaści na stoł i pakazać: starejšyja braty-rasijanie, vy pahladzicie, jakija pasłuhi my vam akazvajem, i heta niatanna». Alaksandr Łukašenka taksama adznačyŭ, što niadaŭna Biełaruś za svaje hrošy zakupiła ŭ Rasii samaloty Su-30sm. «Ale my ž vykonvajem i funkcyi abarony na hetym napramku Rasijskaj Fiederacyi, naroda Rasii. Dyk čamu nam nie dapamahčy? Čamu nie pastavić sučasnuju zbroju? My ŭmiejem joj karystacca nie horš, čym rasijanie, ale płacim za heta kałasalnyja hrošy.
Ja nie da taho, što my nie budziem vykonvać svaje funkcyi. Ja da taho, što nie treba viakać u srodkach masavaj infarmacyi i navat užo na dziaržaŭnym uzroŭni, što biełarusy — hiry na nahach», — zajaviŭ Alaksandr Łukašenka.
«Tamu treba ŭsie hetyja pytańni zvodzić na ŭzroŭni ŭrada i na stoł: voś, my dapamahajem. I kab rasijskaje hramadstva viedała i razumieła, što nijakija biełarusy nie nachlebniki, što ruskamu čałavieku, rasijaninu, u Biełarusi nie horš, čym u Rasii. Davajcie prama kazać: lepš, čym u Rasii. I jany heta adznačajuć, — skazaŭ jon. — Tamu, kali rasijskaje kiraŭnictva hatovaje ŭ hetym kirunku dziejničać, tady davajcie budziem ź imi zaklučać novy dahavor pa abaronie našych miežaŭ.
Kali rasijanie nie chočuć hetaha, tady nam treba być hatovymi, jak my i pracujem zaraz, dziejničać, abaraniajučy svaje intaresy ad imia Respubliki Biełaruś, u adzinočku.
Usie hetyja pytańni pavinny być adkrytyja, sumlennyja i abmiarkoŭvacca na pieramovach z kiraŭnictvam Rasijskim Fiederacyi, u dadzienym vypadku z pamiežnym viedamstvam».
Biełaruś i Rasija raniej užo prapracavali dalejšyja kroki pa sumiesnaj abaronie miežaŭ. Kiraŭnik dziaržavy pacikaviŭsia, jakich damoŭlenaściej dasiahnuli baki i jakija prapanovy Dziaržpahrankamiteta z nahody dalejšaha losu dahavora ab achovie źniešniaj miažy Sajuznaj dziaržavy.
