Fota Nadziei Bužan
Dziaržsakratar Rady biaśpieki Biełarusi Stanisłaŭ Zaś kanstatuje šerah niehatyŭnych nastupstvaŭ dla respubliki z-za adkrytaści sumiesnaj miažy z Rasijaj. Pry hetym Zaś paćviardžaje, što «hetaja miaža zaŭsiody budzie svabodnaj», piša BiełTA
Jon padkreśliŭ, što adkrytaść sumiesnaj hranicy maje dla Biełarusi jak plusy, tak i minusy.
Adzin ź niehatyŭnych momantaŭ - niezakonnyja mihranty z Rasii, jakija, karystajučysia prazrystaściu hranicy, sprabujuć praniknuć na terytoryju Biełarusi, a tut ich zatrymlivajuć i departujuć. Akramia taho, asnoŭny patok kantrabandy narkotykaŭ, što zatrymlivajecca biełaruskimi pahraničnikami, nakiroŭvajecca ŭ asnoŭnym u Rasiju.
Stanisłaŭ Zaś taksama źviarnuŭ uvahu na dziejańni susiedniaj dziaržavy: «My jak tranzitnaja kraina stračvajem svaju pryvabnaść, tamu što vystaŭlajucca dadatkovyja punkty kantrolu i tam zavaročvajucca hramadzianie i hruzy, jany prachodziać praź inšyja krainy. Heta minus dla nas».
«My heta taksama pavinny adkryta havaryć i našym hramadzianam, i našym partnioram, — adznačyŭ dziaržsakratar. — Razam z tym, supastaŭlajučy minusy z tymi plusami, jakija majem dla našych hramadzian i krainy, my, viadoma, i dalej budziem prytrymlivacca taho, što heta hranica zaŭsiody budzie svabodnaj. Tamu što heta pierš za ŭsio vielmi zručna dla ludziej - i rasijan, i biełarusaŭ».
Šmat hadoŭ pracavała sistema, kali pravierku dakumientaŭ viali tolki biełaruskija pahraničniki na źniešniaj hranicy Sajuznaj dziaržavy, vykarystoŭvajučy adziny z rasijanami śpis nieŭjaznych asob. Adnak potym Rasija ŭ adnabakovym paradku ŭviała kantrol na hranicy ź Biełaruśsiu. «U čym tut sens, karysnaść hetych novych krokaŭ - my nie bačym. A peŭnyja niazručnaści, viadoma, jość», - padkreśliŭ Stanisłaŭ Zaś.
