Abjadnanaja śledčaja hrupa (JIT), jakaja zajmajecca rasśledavańniem hibieli rejsa MH-17 na Danbasie ŭ lipieni 2014 hoda, apublikavała zapisy pieramovaŭ, jakija viali «apałčency» tak zvanaj «DNR» i pradstaŭniki Rasii.
«Niadaŭni analiz pakazańniaŭ śviedak i inšaj infarmacyi pakazaŭ, što ŭpłyŭ Rasii na DNR vychodziŭ za ramki vajennaj padtrymki, i što adnosiny pamiž rasijskimi čynoŭnikami i lidarami DNR byli, vidać, bolš ščylnymi… Mienavita tamu siońnia JIT publikuje novy zvarot da śviedak», — havorycca ŭ pres-relizie śledčaj hrupy.
U paćviardžeńnie viersii ab tym, što lidary «DNR» mahli atrymlivać ukazańni z Rasii, JIT apublikavała novyja rasšyfroŭki pierachoplenych telefonnych razmoŭ.
JIT apublikavała zapisy telefonnych razmoŭ kiraŭnictva «DNR», u pryvatnaści, jak śćviardžajuć śledčyja, tak zvanaha «ministra abarony» samaabvieščanaj respubliki ŭ 2014 hodzie Ihara Hirkina (Strałkova) i «kiraŭnika ŭrada» Alaksandra Baradaja.
Na adnym ź ich, čałaviek, jaki ŭ spravazdačy śledčych paznačany jak Baradaj, kaža, što vykonvaje zahady i abaraniaje intaresy «vyklučna adnoj dziaržavy», a na inšym, zroblenym u žniŭni 2014 hoda, Hirkin paviedamlaje Baradaju, što «viartajecca da štaba». U tym ža miesiacy abodva jany pakinuli «DNR».
Členy «DNR» vykarystoŭvali srodki śpiecsuviazi, častku ź jakich pieradała Rasija. Ich vykarystoŭvali rasijskija vysokapastaŭlenyja asoby dla kantaktaŭ z «apałčencami».
