Školnik Iłaryjon T. papiaredžany kamisijaj pa spravach niepaŭnaletnich Maskoŭskaha rajonu Miensku za ŭdzieł u akcyi, jakaja prajšła na płoščy Svabody 6 kastryčnika. Tady ŭ centry Miensku Mikałaj Statkievič pravioŭ u miežach pieradvybarčaha pikieta sustreču ŭ abaronu niezaležnaści. Za ŭdzieł u pikiecie pakul nichto nia byŭ pakarany, piša Radyjo Svaboda.
Iłaryjon T. vučycca ŭ 10 klasie. Dla niepaŭnaletniaha aktyvista heta druhoje za hod pakarańnie. Razhladu čakaje jašče adzin składzieny na jaho pratakoł, ad 3 listapada, nibyta za chulihanstva kala restaracyi ŭ Kurapatach. Kali kamisija pa spravach niepaŭnaletnich budzie razhladać hety pratakoł, Iłaryjonu T. pakul nie paviedamili.
«Mianie pałochajuć, što kali nia vypraŭlusia, zabiaruć ź siamji i adpraviać u specškołu ŭ Mahiloŭ. Kolki dla hetaha treba «naźbirać» pakarańniaŭ, nia kažuć, što jašče horš, bo ŭvieś čas pačućcio, nibyta visiš na vałasku. Novaje papiaredžańnie budu abskardžvać, jak i raniejšyja», — skazaŭ Svabodzie Iłaryjon T.
Pry razhladzie pratakołu Iłaryjon T. davodziŭ kamisii, što ŭdzielničaŭ nia ŭ masavaj akcyi, na jakuju patrebny dazvoł haradzkich uładaŭ, a ŭ sustrečy z vybarcami.
«Pavodle vybarčaha kodeksu takija pikiety nie patrabujuć uzhadnieńnia, kali pravodziacca ŭ miescach, zhodnych z zakonam. Na pikiecie nichto ź milicyjantaŭ nie papiaredžvaŭ, što my biarom udzieł u niečym niezakonnym, nikoha nie zatrymlivali i nie składali pratakołaŭ. Pratakoł na mianie dasłali paźniej», — skazaŭ junak vykanaŭcy abaviazkaŭ staršyni kamisii Śviatłanie Kudzinaj dy inšym siabram kamisii. U vyniku kamisija pa spravach niepaŭnaletnich Maskoŭskaha rajonu vyniesła Iłaryjonu T. papiaredžańnie mienavita za ŭdzieł u niesankcyjanavanaj masavaj akcyi.
«Čamu abrali dla pakarańnia mienavita mianie? Na inšych nie naciśnieš, a mianie spadziajucca jašče adšturchnuć ad «aktyvizmu». Hetak i kazali: «Navošta tabie Kurapaty? Jany tabie niepatrebnyja»».
Razam ź junakom na pasiedžańnie kamisii pa spravach niepaŭnaletnich była vyklikanaja maci Iłaryjona Volha T. Na žančynu byŭ składzieny pratakoł za nienaležnaje vykanańnie baćkoŭskich abaviazkaŭ. Paśla vyvučeńnia spravy i piarečańniaŭ advakata spravu maci aktyvista kamisija adpraviła ŭ milicyju na dapracoŭku.
Takija kamisii dziejničajuć pry vykanaŭčych orhanach miascovaj ułady, zvyčajna ich uznačalvajuć namieśniki staršyniaŭ rajvykankamaŭ, a ŭvachodziać u kamisii čynoŭniki, pedahohi, milicyjanty, pradstaŭniki praŭładnych hramadzkich arhanizacyj. U kampetencyi kamisii pa spravach niepaŭnaletnich — razhladać spravy niepaŭnaletnich parušalnikaŭ Administracyjnaha kodeksu, vynosić papiaredžańni, štrafavać i navat chadajničać pierad sudom ab nakiravańni junakoŭ u specustanovu. Pasiedžańni kamisij pavinny prachodzić adkryta.
Na pasiedžańnie, dzie razhladałasia sprava abaroncy Kurapat Iłaryjona T., naziralnikaŭ puścili, ale zabaranili fota- i videazdymku, sprabavali zabaranić aŭdyjozapis.
