U Homli na placoŭcy kala supermarkietu «Eŭraopt» pa vulicy Chatajeviča prajšoŭ ahitacyjny pikiet, na jakim prysutničali vosiem kandydataŭ u deputaty. Adnaho ź ich, fermera Juryja Hanceviča, pierad pikietam zatrymali, piša Radyjo Svaboda.
Na placoŭcy pierad supermarkietam adklučyli vuličnaje aśviatleńnie — jak i va ŭsim kvartale. Lichtary nie hareli ni na ažyŭlenym moście, ni kala samoj kramy. Tamu arhanizatary pikietu nie zmahli padklučyć hukaŭzmacnialnuju aparaturu i zapuścić muzyku.
Na pikiet sabralisia vosiem kandydataŭ — z Homla, Žłobina i Śvietłahorsku. Schod anansavaŭ błohier Siarhiej Cichanoŭski (Youtube-kanał «Kraina dla žyćcia»). Jaho padtrymaŭ mienski błohier «MozhON». Jany i byli asnoŭnymi pramoŭcami na pikiecie.
Sabralisia kala «Eŭraoptu» pa stanie na 17.00 kala 300 čałaviek. Potym šerahi słuchačoŭ značna paradzieli.
Udzielniki pikietu chadzili ŭ kramu pisać skarhi na adklučeńnie vuličnaha aśviatleńnia, ale administracyja supermarkietu admaŭlała svaju datyčnaść da adklučeńnia.
Na pikiecie vystupiŭ kandydat u deputaty Ŭładzimier Niapomniaščych, jaki ŭ ciopłuju paru hodu chodzić u majcy «Łukašienko, uchodi. Chvatit, dostał». Jon paŭtaryŭ svoj pieršy punkt prahramy — «Impičment Łukašenku». Za hetyja słovy jaho vystup nie puścili ŭ efir.
Kandydat u deputaty Taciana Kanieŭskaja raskazvała pra prablemy tych, chto trapiŭ pad žorstkija prysudy pa «narkatyčnym» artykule 328. Śvietłahorski kandydat Andrej Smalančuk — pra krytyčnuju sytuacyju na «śmiardziučym» kitajskim zavodzie, jaki, pa jaho słovach, trucić žycharoŭ rajcentru. Kandydat u deputaty Julija Hanisieŭskaja aburałasia, što ŭ novym mikrarajonie «Chutar» niama ani škoł, ani dziciačych sadkoŭ, zatoje jość plany pabudavać «raskošny sud». Na pikiecie źbirali podpisy za dziciačy sad i škołu ŭ mikrarajonie «Chutar».
Na pikiecie stała viadoma, što kandydata-fermera Juryja Hanceviča milicyja zaviezła ŭ haradzki špital № 4 — ź nieviadomaj pryčyny. Razam ź im u špital zavieźli Juryja Ŭłasava i Alaksieja Jelisiejeva, jakija pajechali baranić fermera ad DAI. Ich los pakul nieviadomy.
Najbolš na pikiecie krytykavali dziejnuju ŭładu, kazali pra adsutnaść spraviadlivych vybaraŭ, ekanamičnyja prablemy.
«Mianie nie zadavalniaje toje, što adbyvajecca ŭ našym Homli. U mianie blizkija ludzi pamierli ad ankalohii, pryjacielka zachvareła na rak kryvi. Ułady maŭčać — im usio dobra. Pra vybary ja naohuł maŭču — heta ŭžo chraničnaja chvaroba. Ja adklučyŭ doma telebačańnie, kab nia bačyć voś hetaha kiraŭnika dziaržavy tam, abrydła ŭsio heta. Ja nie chaču jaho bačyć, i syn moj, jamu 11 hadoŭ, — nia choča», — patłumačyŭ, čamu pryjšoŭ na pikiet, žychar Homla Siarhiej.
Jahonaha pryjaciela, 39-hadovaha baćku čatyroch dziaciej Andreja chvaluje toje, «jak možna vyžyć na zarobak z takimi cenami, jak u nas». «U krainie šmat treba źmien, ale samaje hałoŭnaje, ja tak liču, — sapraŭdnyja vybary. Buduć sapraŭdnyja vybary — buduć i źmieny», — ličyć Andrej.
Pensijanerka Halina pryjšła na pikiet sa svaim mužam Alaksandram. «Ja padtrymlivaju kandydata Ŭładzimiera Niapomniaščych. Ja chaču kankretnyja źmieny — prezydent pavinien syści. Česnych vybaraŭ u nas nikoli nie było», — vykazałasia žycharka Homla.
Jaje muž ličyć, što ciapierašniaja ŭłada za 25 hadoŭ ničoha nie zrabiła dla narodu. «My nia chočam hetaha prezydenta», — dadaŭ Alaksandar.
Žycharku Homla Śviatłanu chvaluje los biełaruskaj movy i biełaruskaści. «Ja za adradžeńnie nacyi. Tamu pryjšła siudy pasłuchać ludziej. Dziela našaj biełaruskaj movy i dziela razumnaha sensu ja tut», — skazała Śviatłana.
Na placoŭcy kala «Eŭraoptu» prysutničała šmat supracoŭnikaŭ milicyi ŭ cyvilnym. Błohiery skardzilisia na błahuju suviaź i vykazvali mierkavańnie, što jaje «hłušyli» ź niekalkich mikraaŭtobusaŭ, jakija stajali niepadalok.
Pikiet prajšoŭ bieź incydentaŭ.
