Fota Nadziei Bužan
Partniorstva dziaržavy i biznesu ŭ śfiery inavacyj źjaŭlajecca nieabchodnaj umovaj dynamičnaha raźvićcia krainy. Ab hetym zajaviŭ premjer-ministr Biełarusi Siarhiej Rumas u paniadziełak na adkryćci Suśvietnaha tydnia pradprymalnictva, piša BiełTA.
Kiraŭnik urada adznačyŭ, što ŭ hetym hodzie klučavoj temaj forumu stanie tema inavacyj. «Efiektyŭnaje partniorstva dziaržavy i biźniesu ŭ hetaj śfiery - nieabchodnaja ŭmova dynamičnaha raźvićcia našaj krainy», - ličyć jon.
«Biełaruś razam ź inšymi krainami ŭstupaje ŭ postindustryjalnuju infarmacyjnuju eru. Siońnia tavary i pasłuhi navukajomistych vytvorčaściej, pieradavaja technika i technałohii litaralna pranizvajuć usie baki žyćciadziejnaści ludziej. Ličbavizacyja stała faktaram kankurentazdolnaści praktyčna va ŭsich halinach ekanomiki i śfiery dziaržaŭnaha kiravańnia», - adznačyŭ premjer-ministr.
Jon dadaŭ, što ŭ Biełarusi jość peŭnyja dasiahnieńni na hetym šlachu: dziaržava ŭvachodzić u pieršuju dziasiatku krain śvietu pa takich pakazčykach hłabalnaha inavacyjnaha indeksa, jak raspracoŭka mabilnych dadatkaŭ, vynachodki i karysnyja madeli, vyšejšaja adukacyja, i ŭ pieršuju dvaccatku - pa eksparcie IT-pasłuh.
«Jość paśpiachovy prykład uzajemadziejańnia dziaržavy i biznesu - heta Park vysokich technałohij, - adznačyŭ Siarhiej Rumas. - Za apošnija dva hady ŭkład PVT u vałavy ŭnutrany pradukt, u ekspart praktyčna padvoiŭsia».
Mnohaje, pavodle słoŭ premjera, robicca dziaržavaj dla raźvićcia partniorskich adnosin ź biznesam. «My vyjšli na novy ŭzrovień hramadskaha abmierkavańnia rehulatarnych inicyjatyŭ dziaržaŭnych orhanaŭ kiravańnia, pačałasia raspracoŭka zakonaprajekta ab samarehulujemych arhanizacyjach, — adznačyŭ kiraŭnik urada. - Hety prajekt pradoŭžyć kurs na likvidacyju zališnich administracyjnych barjeraŭ u dziejnaści biznesu».
Šmat uvahi ŭ Biełarusi nadajecca ŭdaskanaleńniu finansavaj padtrymki pradprymalnictva. Urad va ŭzajemadziejańni z bankami prapracoŭvaje napramki pa spraščeńni dostupu da finansavych resursaŭ, pašyrajecca liniejka praduktaŭ, što prapanujucca bankaŭskaj sistemaj dla pradprymalnikaŭ dla pačatku i raźvićcia biźniesu. Hetymi dniami byŭ padpisany ŭkaz numar 412 «Ab padtrymcy ekspartu».
Urad aktyŭna padtrymlivaje raźvićcio inavacyjnaj dziejnaści. U 2020 hodzie raschody biudžetu na hetyja mety buduć pavialičany na 16 pracentaŭ.
«My starajemsia rabić usio, kab biznes adčuvaŭ, što jaho śmiełyja i inavacyjnyja rašeńni dziaržavaj padtrymlivajucca», - padkreśliŭ premjer.
