Deputaty Pałaty pradstaŭnikoŭ 19 listapada pryniali ŭ pieršym čytańni prajekt respublikanskaha biudžetu na 2020 hod. Prajekt biudžetu pradstaviŭ pieršy namieśnik ministra finansaŭ Juryj Sielivierstaŭ, paviedamlaje BiełTA.
Pavodle jaho słoŭ, prajekt biudžetu na 2020 hod praduhledžvaje:
— temp rost VUP 101,9%,
— rost siaredniehadavoj inflacyi 105%,
— staŭku refinansavańnia na ŭzroŭni 9,5%,
— košt na naftu marki URALS — 60 dalaraŭ za baral,
— pierapracoŭku impartnaj nafty z Rasii ŭ abjomie 18 młn ton.
Dachody biudžetu na 2020 hod sfarmiravanyja ŭ sumie 24,4 młrd biełaruskich rubloŭ (pryrost na 0,3% da ŭzroŭniu 2019 hoda), vydatki — u 25,4 młrd rubloŭ (111,4% da čakanych u 2019 hodzie). Takim čynam, prajekt biudžetu sfarmavany z deficytam u 995,1 miljona rubloŭ.
«Dachodnaja baza raźličanaja va ŭmovach narastańnia ŭpłyvu padatkovaha manieŭru. Ahulny abjom strat dachodaŭ biudžetu ŭ 2020 hodzie aceńvajecca ŭ 1,9 młrd rubloŭ», — skazaŭ Jury Sielivierstaŭ.
Pavodle jaho, na zarpłaty biudžetnikaŭ u 2020 hodzie dadatkova nakirujuć kala 1,8 młrd rubloŭ, što «daść mahčymaść vykanać uzhodnienyja uradam hrafiki pavyšeńnia zarobkaŭ piedahahičnych i miedycynskich rabotnikaŭ». Usiaho vydatki na apłatu pracy składuć bolš za treć ad ahulnaha abjomu (z ulikam adličeńniaŭ na sacyjalnaje strachavańnie).
Vydatki na sacyjalnuju śfieru pavialičacca nie mienš čym na 11%.
U prajekcie biudžetu praduhledžanyja taksama srodki na padaŭžeńnie finansavańnia siamiejnaha kapitału na siarednieterminovy pieryjad (kala 350 młn rubloŭ), na adnarazovuju dapamohu vieteranam Vialikaj Ajčynnaj vajny, da 75-hodździa Pieramohi (18 młn rubloŭ). Praduhledžanyja i peŭnyja navacyi ŭ žyllovym budaŭnictvie.
Pavialičać padtrymku abłaściam Biełarusi: amal na tracinu (da 5,3 młrd rubloŭ) uzraście pamier srodkaŭ, jakija pieradajucca ŭ miascovyja biudžety z respublikanskaha.