Fota Siarhieja Hudzilina
Biełaruski i rasijski baki całkam uzhadnili 21 z 31 intehracyjnaj darožnaj karty. Ab hetym paviedamiŭ pasoł Biełarusi ŭ Rasii Uładzimir Siamaška siońnia ŭ Maskvie na ekśpiertna-miedyjnym forumie «Sajuznaja dziaržava 2030 - trajektoryja budučyni», piša BiełTA.
Pavodle słoŭ Uładzimira Siamaški, na ranicu 19 listapada, heta značyć da pačatku pierahavoraŭ premjer-ministraŭ Biełarusi i Rasii byli poŭnaściu ŭzhodnieny i parafiravany 16 darožnych kart. «Učora ŭ čas, ja liču, plonnaha praviadzieńnia sustreč dvuch premjer-ministraŭ my jašče pa piaci darožnych kartach pryjšli da kansensusu, znajšli raźviazki i dali daručeńnie ministram, kab jany da kanca biahučaha tydnia pakłali hetyja ŭzhodnienyja darožnyja karty na stoł, - skazaŭ pasoł. - Heta značyć jašče plus piać kart».
Razam z tym Uładzimir Siamaška adznačyŭ, što zastajucca niaŭzhodnienymi surjoznyja pytańni, jakija datyčacca, pierš za ŭsio, enierhietyčnaha błoka, dostupu na ŭzajemnyja rynki, mytnaha i padatkovaha zakanadaŭstva.
«Ja liču, što heta takija pryncypovyja, sistemaŭtvaralnyja pytańni, ale dumaju, što jany buduć u rešcie rešt vyrašany», - padkreśliŭ jon. Pasoł nahadaŭ, što ŭ biełaruska-rasijskich adnosinach užo nieadnarazova byvali pieryjady haračych sprečak pa tych ci inšych prablemach. «Takija padziei ŭžo byli, ale ŭ rešcie rešt razvažlivaść pieramahała i my zaŭsiody znachodzili raźviazki. Dumaju, što my i ciapier znojdziem hetyja raźviazki. Heta vyznačyć naša sumiesnaja Sajuznaja dziaržava na bližejšyja niekalki dziesiacihoddziaŭ», - reziumavaŭ dypłamat.
