Namieśnik staršyni Tavarystva biełaruskaj movy Dzianis Tušynski zapatrabavaŭ u Minskaj haradskoj vybarčaj kamisii pieraličyć hałasy u Puškinskaj vybarčaj akruzie №103, pa jakoj bałatavaŭsia sam.
Siarod inšaha, jon apielavaŭ i da dvuch artykułaŭ, apublikavanych u «Našaj Nivie».
Čytajcie:
Jak adbyvajecca padlik hałasoŭ. 20 FOTA, ź jakich vy zrazumiejecie ŭsio
Kolki biuleteniaŭ vynieśli z učastkaŭ u Minsku — zachaplalnaja statystyka
Dzianis Tušynski raskazaŭ «Našaj Nivie» svaje ŭražańni ad sustrečy ź Minskaj haradskoj vybarčaj kamisijaj.
«Kali ścisła, to pazicyja kamisii nastupnaja:
1) Strata 380 biuleteniaŭ — vypadkovaść, raźbiežka ź inšymi akruhami i rajonami ździŭleńnia ŭ ich nie vyklikaje.
Bolš za toje, akazvajecca, Frunzienski rajon «zaŭždy ŭ lidarach pa źniesienych biuleteniach».
2) Fota sa stosam biuleteniaŭ, jakija vypali sa skryni «maje ilustratyŭny charaktar», «nieviadoma dzie i kali źniataje». Da taho ž, «pry vykidvańni sa skryni taki akuratny stosik prosta nie moža zachavacca».
3) Pa-asablivamu pryhoža aformlenyja abviestki kandydata Vasila Panasiuka na sajcie akruhovaj kamisii — «tamu, što jon pradstaviŭ ich u kamisiju ŭ takim vyhladzie». I niavažna, što dyzajn hetych abviestak na sto adsotkaŭ supadaje sa stylem abviestak samoj kamisii. Heta ž jak padhadaŭ!
4) Skarha na toje, što kamisija nie zadavolniła ni adnu z 9 zajavaŭ na praviadzieńnie sustrečaŭ z vybarcami (usie ŭ viačerni čas), zamiest hetaha daŭšy tolki try škoły ŭ siaredzinie budnich dzion (a ŭ astatni čas, byccam, užo ŭsio zaniata inšymi kandydatami). Ale voś zakavyka — nijakich abviestak ab sustrečach hetych «inšych kandydataŭ» u zajaŭleny mnoj čas na sajcie kamisii niama. Skarha praihnaravana, maŭlaŭ, «nu, moža, niejkija kandydaty byli suprać taho, kab abviestki ab ich sustrečach publikavalisia na sajcie».
5) Sistematyčny zryŭ najaŭnaj ahitacyi — praihnaravana.
6) Razychodžańni dadzienych naziralnikaŭ z aficyjnymi vynikami pa jaŭcy na kožnym z 34 učastkaŭ — praihnaravana».
Minskuju haradskuju vybarčuju kamisiju ŭznačalvaje miedyk Dźmitryj Šaŭcoŭ. Jon byŭ deputatam dvuch papiarednich sklikańniaŭ.