Epizod kupańnia ŭ hrazi aleniaŭ trapiŭ na videa. Niekalki samak prymajuć hrazievyja vanny prosta pasiarod vosieńskaha lesu, paviedamlaje sajt Biełaviežskaj Puščy.
Hetyja žyvioły žyvuć statkami i trymajucca zvyčajna nievialikimi hrupami da 20 asobin. Vielmi redka, kali vyšynia śniežnaha pokryva dasiahaje 70-100 sm, jany vymušanyja źbiracca pablizu karmavych palan ŭ bolš bujnyja statki da 60 asobin. Učastki pasialeńnia samak i samcoŭ, jak praviła, supadajuć tolki ŭ pieryjad sparvańnia (žnivień-vierasień).
Siezonnyja pieramiaščeńni aleniaŭ u miežach svajho miescapražyvańnia dobra źviazany, pierš za ŭsio, sa źmianieńniem karmavoj bazy. Pasucca aleni pieravažna ranicaj i ŭviečary, a dniom adpačyvajuć. Dla abarony vałasianoha i skurnaha pokryva ad parazitaŭ i nasiakomych aleni z zadavalnieńniem valajucca ŭ hrazi abo piasku, takuju karcinu zvyčajna možna nazirać padčas honu.
Na terytoryi Biełarusi jeŭrapiejski vysakarodny aleń byŭ šmatlikim da XVII stahodździa, i, pa niekatorych danych, byŭ bujniejšy pa pamierach. Adnak u kancy XVIII stahodździa hety vid kapytnych u Biełaviežskaj puščy byŭ całkam źniščany. U 1865 hodzie siudy ŭ abmien na zubroŭ zavieźli ź Silezii pieršuju partyju aleniaŭ (5 samcoŭ i 13 samak). U naturalnyja ŭmovy vysakarodnych aleniaŭ vypuścili tolki ŭ 1890 hodzie, pakłaŭšy pačatak ciapierašniaj papulacyi.
