Pradstaŭniki kaardynacyjnaj rady «Adzinstva», jakaja abjadnoŭvaje krajnie levych prychilnikaŭ intehracyi z Rasijaj, źviarnulisia da novaha kiraŭnika Administracyi prezidenta Ihara Sierhiejenki z prośbaj dazvolić im mitynh na Kastryčnickaj płoščy apoŭdni 20 śniežnia.
Valeryj Drako na fota ŭ centry.
Pad zvarotam padpisalisia Valeryj Drako (arhanizatar «Bieśśmiarotnych maršaŭ») i balšavik Vasil Zielikaŭ. Treci pradstaŭnik «Adzinstva» Leanid Školnikaŭ «znachodziŭsia ŭ hetyja dni ŭ Bruseli», tamu jaho podpisa niama pad zvarotam.
Zajaŭniki pišuć, što 7-8 śniežnia ŭ centry Minska prajšli akcyi suprać «sajuznaj dziaržavy», što vyklikała «niehatyŭnuju reakcyju ŭ biełaruskim hramadstvie». Drako i Zielikaŭ kažuć, što 20 śniežnia pavinna adbycca sustreča Alaksandra Łukašenki i Uładzimira Pucina, dzie vyrašać «astatnija ekanamičnyja pytańni».
«Prajšła akcyja «U Jeŭropu», pavinna być i za sajuznuju dziaržavu, — kaža ŭ kamientary «NN» Valeryj Drako. — My ŭsio ž nie ŭ Jeŭrasajuzie žyviem, a ŭ sajuznaj dziaržavie. My zaŭsiody byli i budziem za sajuz. Kali dalej tak pojdzie, to možam dakacicca da ŭkrainskaha scenaru».
Valeryj Drako kaža, što źviarnulisia naŭprost da Administracyi prezidenta, bo zajaŭka ŭ Minharvykankamie razhladajecca da 15 dzion. Pakul adkazu ad uładaŭ nie prychodziła.
Darečy, akcyja zapłanavanaja na 12:00 u pracoŭny dzień. Ci nie ličyć spadar Drako, što na jaje nichto nie pryjdzie? «Jak atrymałasia, što ŭžo tut dumać», — adkazvaje zajaŭnik.
«Kali nie dazvolać, to źbiracca nie budziem. Hrošaj u nas niama, kab štrafy apłočvać. Adreahujem na heta praz našy sajty i haziety», — zaznačaje Valeryj Drako.
Hladzi taksama: Stalinisty-balšaviki: chto arhanizoŭvaje «Nieśmiarotny połk» u Minsku?
