Tak nahniatajecca psichoz
Jak, vy jašče nie viedajecie? Biełarusi pahražaje strata niezaležnaści!
Heta tolki mlavy nie abmiarkoŭvaje.
Siońnia, kali ja pišu hetyja radki, 15 śniežnia. I ŭsiaho paru dzion tamu nazad na «Biełsacie» vyjšaŭ repartaž, jaki nie pakinie abyjakavym sapraŭdnaha patryjota svajoj ajčyny:
Ja nie viedaju, chto taki Sierhiej Skamiejkoi ci sapraŭdy jon isnuje. Ale ŭčora jon (ci niechta ad jaho imia) zatehaŭ hetym videa moj profil u Fejsbuku, a jašče profili amal 50 čałaviek, zbolšaha aktyvistaŭ-entuzijastaŭ sami-znajecie-jakoha-ruchu.
Jak i varta było čakać, takaja navina takich ludziej nie pakinuła ŭ abyjakavaści.
Ludziam stała strašna.
Dziva što:
Rasieja padstupaje, Baćkaŭščyna ŭ niebiaśpiecy.
Z nami budzie jak z Krymam!
Nu i što z taho, skažacie vy: takija ŭkidy i raniej byli. I ŭvohule Biełsat ─ heta zamiežnaje ŚMI.
Adrazu adkryju karty: nahniatańnie psichozu straty niezaležnaści moža być nie prosta čarhovym ukidam, ale novym elemientam vybarčaj kampanii ŭładaŭ.
Na arhumient pra Biełsat možna adkazać arhumientam pra Fejsbuk: Fejsbuk taksama de fakta zamiežnaje ŚMI. Ale ž efiektyŭna pracuje, kali zachacieć!
Baronim niezaležnaść razam z prezidentam
Pra toje, što baraćba za niezaležnaść ciapier nabyła novyja akcenty, mianie zmusili padumać nie publičnyja akcyi ŭ Minsku, a ciapier i ŭ Harodni, a infarmacyja , što 11 śniežnia na schodzie ŭsioj apazicyi było pastanoŭlena:
…Dazvolić ludziam prychodzić z čyrvona-zialonymi ściahami i nie pieraškadžać prysutnaści dziaržaŭnaj simvoliki.
Damahčysia pryjomu ŭ premjer-ministra Siarhieja Rumasa i inšych VIP-čynoŭnikaŭ.
Zaprasić na akcyi za niezaležnaść BRSM, «Biełuju Ruś» dy inšyja pradziaržaŭnyja struktury…
Jano i to jasna: kali vorah la paroha rodnaj chaty, nie čas dumać pra toje, što nas raźjadnoŭvaje. Zhurtujemsia ŭsie razam, zabudziemsia pra padzieły!
Upieršyniu za doŭhi čas apazicyja hatova vystupić z uładaj adzinym frontam, praŭda, jak małodšy partnior: usie siły kiniem na toje, kab dabicca pryjomu ŭ libieralnaha Siarhieja Rumasa, jaki časam z žonkaj havoryć pa-biełarusku!
Vyhladaje, adnak, što adčuvańnie straty niezaležnaści ŭ śniežni 2019 ─ heta miascovy biełaruski siužet. Nichto z surjoznych ekśpiertaŭ z Rasii ciapier nie havoryć pra taki scenaryj. Hlańcie śviežy artykuł z krasamoŭnaj nazvaj «Pohłoŝienije, kotoroho niet. Počiemu Krieml nie možiet vybiť ustupki iz Łukašienko» na sajcie Maskoŭskaha centra Karniehi ci «Dałučeńnie Biełarusi da RF rasiejcy ŭsprymuć jak «pasadzili nam na šyju novych darmajedaŭ» na sajcie Radyjo Svabody.
Adkul ža žadańnie padtrymać ułady? Z taho prostaha faktu, što Rasieja pakul nie daje aficyjnamu Minsku nizkich cenaŭ na haz i naftu na nastupny hod, patrabujučy palityčnych sastupak.
Vy heta surjozna? Toje, što Łukašenka pakul u čarhovy raz nie damoviŭsia z Maskvoj ─ strata niezaležnaści?
Nie chvalujciesia ─ damovicca, i niezaležnaść pakul nie stracicca.
Chto i što sapraŭdy pahražaje niezaležnaści
Niezaležnaści Biełarusi pahražaje nie Rasija, a farmat adnosin z hetaj krainaj, vybrany prezidentam Łukašenkam u siaredzinie 1990-ych.
Hety farmat u halinie ekanomiki ŭłady nie ŭ siłach źmianić biez najhłybiejšaha ekanamičnaha šoku, i tamu jany pojduć na heta tolki ŭ razie poŭnaj niavykrutki (što aznačaje, što najchutčej nikoli nie pojduć). U halinie palityki taki farmat pradukuje kryzisy prynamsi ad 2003 h., kali Rasija ŭpieršyniu vykarystała hazavuju trubu jak palityčnuju zbroju, i budzie pradukavać ich nadalej.
Nie Rasija prymusiła Biełaruś u 1990-yja vypracavać taki farmat adnosin. Napačatku heta była inicyjatyva novaabranaha biełaruskaha prezidenta.
Dyj i ciapier mała što źmianiłasia. Jak-nijak ─ my adzin narod.
Bolš za toje, Rasija nie jość subjektam unutranaj biełaruskaj palityki, i ź joj biessensoŭna zmahacca ŭnutrypalityčnymi srodkami.
Kali apazicyja choča źmienšyć rasijskuju pahrozu, jana pavinna dabivacca nie sustrečy z Rumasam, a pierahladu isnych biełaruska-rasijskich damoŭlenaściaŭ, u pryvatnaści pra stvareńnie Sajuznaj dziaržavy, a nie ŭsprymać ich jak niešta dadzienaje zvyš.
Uvohule, apazicyja pavinna zmahacca ŭ krainie za ŭładu, a nie vystupać z tymi siłami, jakija hetuju ŭładu zachapili, adzinym frontam suprać ujaŭnaj zamiežnaj pahrozy padčas štučna stvoranaha psichałahičnaha kryzisu.
Stratehija «apazicyja zaadno z uładami baronić niezaležnaść» samahubčaja, bo jana zaklikaje zhurtavacca z tymi siłami, jakija hetaj niezaležnaści pahražali, pahražajuć i buduć pahražać.
Paŭtaru jašče raz: pahroza niezaležnaści Biełarusi budzie isnavać datul, pakul dziejničaje damova pra sajuznuju dziaržavu ź jaje takimi atrybutami jak supolny parłamient i valuta, i ŭ šyrokim sensie datul, pakul budzie isnavać niehałosnaja ździełka pamiž Kramlom i aficyjnym Minskam «tannaja nafta i haz naŭzamien na rusifikacyju».
Vysnovy: «Rasijskaja pahroza» jak palittechnałohija i srodak demabilizacyi «niezaležnickaha» elektaratu
Padobna, što palittechnołahi, jakija absłuhoŭvajuć uładu, vyrašyli nie zdavalniacca niazdolnaściu apazicyjnych siłaŭ vypracavać pierakanaŭčuju piersanalizavanuju alternatyvu Łukašenku na budučych vybarach, a maksimalna dezaryjentavać t.zv. «apazicyjny» abo «niezaležnicki» elektarat.
«Rasijskaja pahroza» jak palittechnałohija apieluje da śviatoha dla «niezaležnikaŭ» ─ niezaležnaści krainy.
Razumavańnie tut prostaje.
Apazicyja słabaja i raźjadnanaja, tamu abaranić jaje jana nie ŭ siłach.
Abaranić jaje možna tolki toj, chto nie znaje parazaŭ užo 25 z hakam hadoŭ. Pravilna, ciapierašnija ŭłady.
Nu, chacieli jany raniej abjadnacca z Rasijaj. Kto staroje pomianiet ─ tomu hłaz von.
Elehantnaja pieramoha ciapier ─ nie prosta pieraabrańnie Łukašenki na piaty termin. Heta «niezaležnicki» elektarat, jaki vieryć, što tolki mocny Łukašenka zdolny abaranić našu niezaležnaść.
