Fota Siarhieja Hudzilina
Minabarony tłumačyć, čamu tak atrymałasia i što rabić, kab takoha z vami nie adbyłosia, piša Radyjo Svaboda.
Pryrodžanaja chvaroba serca
Žycharu Miensku Mikałaju Kaleniku 22 hady. U 2015 hodzie jon atrymaŭ adterminoŭku ad vojska na dva hady, bo maje chvarobu serca. Sioleta Mikałaj akurat traplaŭ na viesnavy pryzyŭ. Majučy na rukach pozvu ŭ kastryčniku 2018 hodu, Mikałaj pajšoŭ u vajenkamat prachodzić medkamisiju. Tam u chłopca zabrali vajskovy bilet, zrabili UHD i skazali: «Da słužby prydatny».
«Ja byŭ pierakanany, što syna nie zabiaruć u vojska, jak jon moža być prydatny da słužby? — dzielicca sa Svabodaj Pavał, baćka chłopca. — U 20 hadoŭ jon chacieŭ pastupać u Akademiju MUS, jaho tam zabrakavali. Skazali, što zdaroŭje nieprydatnaje. Ja jamu tady i kažu, davaj jašče sami pravierymsia».
Mikałaj Kalenik na prośbu baćki pajšoŭ u palikliniku i zrabiŭ jašče adno UHD samastojna. Jano paćvierdziła, što pryrodžanaja chvaroba serca nikudy nie padziełasia. Kaleniki viarnulisia ŭ vajenkamat, jaki pryznačyŭ chłopcu paŭtornuju kamisiju. Jana znoŭ pryznała Mikałaja prydatnym da słužby.
«Ja tady skarhu na imia vajenkoma napisaŭ, kab syna ŭ špitali abśledavali bolš detalova, — praciahvaje Pavał Kalenik. — Mnie z vajenkamata napisali, što treba źviartacca da hałoŭnaha lekara 3-ha kliničnaha špitala. A pryzyŭ kančaŭsia ŭžo. Na 18 krasavika 2019 syna vyklikali ŭ vajenkamat zdać adbitki palcaŭ. Ale syn nia zmoh pryjści: nie adpuścili z pracy. U vyniku na jaho zaviali kryminalnuju spravu za adchileńnie ad słužby. Ja chadziŭ u vajenkamat sam, tłumačyŭ sytuacyju».
U vajenkamacie Kalenikam, kažuć jany, nie pavieryli. Adbyŭsia sud, jaki vyrašyŭ pakarać pryzyŭnika 3825 rublami štrafu. Prysud pryzyŭnik abskardziŭ, razhlad skarhi adbudziecca 10 studzienia ŭ Mienskim haradzkim sudzie. Štrafu Kaleniki pakul nie płacili, sprabujuć jašče raz samastojna pravierycca ŭ daktaroŭ.
«Pra takoje ja padumać navat nia moh»
«U mianie z sercam prablemy z 15 hadoŭ, — raskazvaje Svabodzie sam pryzyŭnik. — Abmiažoŭvali zaniatki sportam. U Akademiju MUS nie ŭziali, kali ja chacieŭ pastupić. A tut skazali ŭ vajenkamacie, što ja hodny. Pa adnym UHD vyrašyli».
Mikałaj śćviardžaje, što słužyć nie admaŭlajecca. Adnak kaža, što kali jamu z 15 hadoŭ abmiažoŭvali zaniatki sportam, značyć možna padazravać i nieprydatnaść da słužby ŭ armii. Chłopiec nastojvaje, što medycynskaja kamisija padyšła da ahladu paviarchoŭna.
«Ja tam prosta ŭ kabinecie spytaŭ, jak mahu asprečyć vyniki pryzyŭnoj medycynskaj kamisii, mnie nichto tołkam ničoha nie patłumačyŭ, — śćviardžaje pryzyŭnik. — Napisaŭ u svabodnaj formie skarhu, jakuju potym na sudzie da materyjałaŭ spravy nie dałučyli. Vypisali mnie pozvuu 16-ha, što ja 18-ha pavinien prynieści adbitki palcaŭ. Ja, kali pastupaŭ u Akademiju MUS, adbitki ŭžo zdavaŭ. Skazaŭ, što ich možna tam uziać. Jany nie pahadzilisia, tady ja pajšoŭ u RUUS, ale tam užo było pozna i adbitkaŭ ja nia zdaŭ. Na nastupny dzień treba było pracavać, ja nia moh u vajenkamat pryjści»
Mikałaj taksama narakaje na toje, što vykliki ŭ vajenkamat atrymlivaŭ nia pozvaj, a praz telefon. I pryznajecca, što navat padumać nia moh, što admova pryjści ŭ vajenkamat moža abiarnucca kryminalnaj spravaj, sudom i vialikim štrafam.
Minabarony: Mikałaj Kalenik moh sam asprečyć rašeńnie kamisii praz sud
Kansultant adździełu pryzyvu na vajskovuju słužbu hałoŭnaha arhanizacyjna-mabilizacyjnaha ŭpraŭleńnia Hieneralnaha štaba Uzbrojenych sił Andrej Murašoŭ na prośbu Svabody prakamentavaŭ sytuacyju z pryzyvam Mikałaja Kalenika. Pa słovach pradstaŭnika Minabarony, sudu i štrafu možna było b paźbiehnuć, kali b pryzyŭnik dziejničaŭ zhodna z normami biełaruskaha zakanadaŭstva.
«Rašeńnie ab katehoryi hodnaści hramadzian pa stanie zdaroŭja, mohuć jany słužyć ci nia mohuć, prymajuć tolki peŭnyja lekary, pryznačanyja rašeńniem miascovaha orhana ŭłady, — skazaŭ pradstaŭnik Minabarony Andrej Murašoŭ. — Inšyja lekary nia mohuć hetaha zrabić. Biaz roźnicy, z kamercyjnaj jany kliniki albo ź dziaržaŭnaj. Jany mohuć tolki dyjahnaz vystavić. Uračy, pryciahnutyja da vajskova-ŭračebnaj ekspertyzy, užo mohuć prymianić kankretny dyjahnaz i vyznačyć stupień prydatnaści da słužby.
Nichto nie sumniavajecca, što ŭ hramadzianina Kalenika jość peŭnaje zachvorvańnie. Heta paćviardžajecca ŭsimi daśledavańniami. Adnak hetaje zachvorvańnie ŭ adpaviednaści z patrabavańniami, jakija dziejničajuć u Biełarusi pa stanie na 2019 hod, nie pieraškadžaje prachodžańniu vajskovaj słužby. U nas isnuje 12 hrafaŭ abmiežavańnia pa stanie zdaroŭja, u adpaviednaści ź jakimi pryzyŭniki mohuć słužyć u peŭnych vojskach. U vypadku z hramadzianinam Kalenikam hrafa vielmi vysokaja, treciaja. Heta značyć, što jon navat moža słužyć u pamiežnych albo ŭnutranych vojskach».
Jak raskazaŭ Andrej Murašoŭ, biełaruskaje zakanadaŭstva praduhledžvaje formu abskardžańnia vynikaŭ pryzyŭnych medkamisij, jakija pravodziacca vajenkamatami. Dla hetaha nieabchodna albo źviarnucca sa skarhaj niepasredna ŭ vyšejšuju kamisiju (abłasnoha albo mienskaha haradzkoha vajenkamata), albo padać skarhu ŭ sud. U takim vypadku pryzyŭnika nia mohuć zabrać na słužbu ŭ armii, pakul skarha nia budzie razhledžanaja ŭ adpaviednych instancyjach.
«Zhodna z vynikami medycynskaha ahladu rašeńnie ab pryzyvie albo niepryzyvie Mikałaja Kalenika na słužbu ŭ vojsku pavinna była prymać pryzyŭnaja kamisija, — raskazvaje Andrej Murašoŭ. — Na terminovuju słužbu albo na słužbu ŭ rezervie. Jon na hetaje pasiedžańnie nie źjaviŭsia. Prajšoŭ medkamisiju, a ŭsie inšyja mierapryjemstvy pryzyvu praihnaravaŭ i bolš u vajskovy kamisaryjat nie źjaŭlaŭsia. Mienavita hetym dziejańniam była sudom dadzienaja pravavaja acenka. Varta było pryjści na paŭtornaje pasiedžańnie pryzyŭnoj kamisii, zajavić skarhu na jaje rašeńnie ab pryzyvie ŭ vojska i, kali b pryzyŭnaja kamisija nie pahadziłasia ź jahonaj skarhaj, źviarnucca albo ŭ terytaryjalnuju pryzyŭnuju kamisiju, albo ŭ sud. Tady b hramadzianina Kalenika paŭtorna abśledavali ŭračy abłasnoha ŭzroŭniu. Ale jon nie pryjšoŭ na pasiedžańnie kamisii. Jaho čakali da apošniaha dnia pryzyvu, i tolki tady źviarnulisia ŭ pravaachoŭnyja orhany, pa vynikach pracy jakich sud aštrafavaŭ pryzyŭnika».
Pa słovach kansultanta Minabarony Andreja Murašova, vypadki, kali pryzyŭniki abskardžvajuć rašeńni medycynskich kamisij, zusim nia redkija. A voś dalejšy los Mikałaja Kalenika pakul nieviadomy i budzie zaležać ad rašeńnia sudu vyšejšaj instancyi, u jakim pryzyŭnik abskardžvaje štraf. Kali jaho pakinuć bieź źmienaŭ, to ŭ viasnovy pryzyŭ Mikałaja Kalenika nie pryzavuć z pryčyny najaŭnaści sudzimaści. Trapić u vojska, pry adsutnaści medycynskich supraćpakazańniaŭ, jon zmoža tolki paśla pahašeńnia sudzimaści.
